23 июня 2017 г.
Кăçалхи районти юрăпа-ташă тата спорт уявĕ Акатуй çĕртме уйăхĕн 10-мĕшĕнче иртрĕ. Ăна Раççейри Экологи, Чăваш Енри Амăшĕпе Ашшĕн çулталăкĕсене тата Канаш районĕ 90 çул тултарнине халалларĕç. Уяв питĕ хаваслă тата савăнăçлă иртрĕ. Интереслĕ самантсем шутсăр нумай пулчĕç унта.
Район администрацийĕн архивĕ Акатуйĕнче «Кăлтăрмач шоу» вăйă йĕркелерĕ (ертсе пыраканĕ архив ĕçченĕ Е.Чернова пулчĕ). Кăлтăрмачра пирĕн район историйĕпе çыхăннă ыйтусем ытларах пулчĕç. Тĕслĕхрен, кăвар чĕреллĕ поэтăмăрпа Çеçпĕл Мишшипе, А.Г.Николаев ячĕллĕ «Космонавт» кану лагерĕпе, Мăкăр ялĕнчи кĕперпе тата вырăнти ытти интереслĕ Пулăмсемпе çыхăннă ыйтусем пулчĕç. Çак вăййа хутшăнакансем асăнмаллах пысăк парнесене илме тивĕçлĕ пулчĕç. Уява килнисем «Кăлтăрмач шоу» вăййа хаваспах хутшăнчĕç, вĕсен йышĕнче хамăр районта çуралса ÿссе тухса кайнисем, Акатуйне курма ятарласа килнисем пулчĕç. Вĕсем район пурнăçĕпе çыхăннă ыйтусене кăсăкланса шырарĕç, тупсăмне тупсан савăнăçне пытармарĕç. Асăннă вăйăпа пурте кăмăллă юлчĕç. Акатуй уявĕнче «Кăлтăрмач шоу» вăййа ирттерме май туса панишĕн сиккассисене (кăлтăрмачне вĕсем ăсталанă) тав сăмахĕ калатпăр.
Е.ЧЕРНОВА