23 июня 2017 г.
Район администрацийĕнче районти агропромышленность комплексĕнче ĕçленĕ ветерансен канашĕн черетлĕ ларăвĕ иртнĕ. Мероприятие район администрацийĕн пуçлăхĕ Владимир Степанов хутшăннă. Владимир Николаевич районăн экономикăпа социаллă аталанăвĕ çинче чарăнса тăнă, ветерансене активлă пурнăç позицине тытса пынăшăн тав тунă, çирĕп сывлăх суннă. Ветерансен умĕнче çавăн пекех Раççей пенси фондчĕн Канашри управленийĕн пуçлăхĕн çумĕ Дамир Сабиров тата хулапа районти халăха социаллă хÿтлĕхпе тивĕçтерекен пайăн эксперт специалисчĕ Ирина Суранова та тухса калаçнă. Вĕсем хăйсем тăрăшакан сферăри саккунсенчи çĕнĕлĕхсемпе паллаштарнă.
АПК ветеранĕсен канашĕн председателĕ Валерий Долгов пуçтарăннисене районти уй-хир ĕçĕсемпе паллаштарнă, агрономири лару-тăру çинче чарăнса тăнă. Район администрацийĕн АПК организацийĕсемпе çыхăнса ĕçлекен тĕп эксперт специалисчĕ Сергей Васильев выльăх-чĕрлĕх отраслĕнчи çитĕнÿсемпе паллаштарнă.
Кăçал Чăваш Енри ветерансен канашĕ йĕркеленнĕренпе пилĕк çул çитет. Çак пулăма халалласа çĕртме уйăхĕн 29-мĕшĕнче Çĕрпÿ хулинче савăнăçлă мероприяти иртĕ. Унта пирĕн районтан çичĕ ветеран хутшăнĕ.
Анастасия ИВАНОВА