09 июня 2017 г.
Çĕртме уйăхĕн 3-мĕшĕнче Çĕнĕ Шелттемре ял йĕркеленсе кайнăранпа 290 çул çитнине паллă турĕç. Уяв спорт шкулĕн стадионĕ çумĕнче иртрĕ. Чи малтанах ялăн хисеплĕ çыннисене: З.Михайлована, Э.Максимована, Л.Давыдована, Е.Сергеевăна, О.Елисеевăна, А.Григорьевăна, Г.Ерицовона, Е.Васильевăна тата Сергеевсен, Крючковсен, Филипповсен çемйисене Хисеп грамотисемпе Тав хучĕсем парса чысларĕç. Концерт программине «Тантăш» вокал ансамблĕ «Тăван ял» юрăпа уçрĕ.
Уява пуçтарăннисене Шелттем ял тăрăхĕн пуçлăхĕ Е.Волков, район администрацийĕн представителĕ С.Павлова, биологи наукисен докторĕ, профессор К.Захаров, педагогика ĕçĕн ветеранĕ Т.Радикова, Чăваш Республикин халăх артисчĕ Г.Медведев саламларĕç. Хăнасен йышĕнче çавăн пекех Раççей Федерацийĕн халăха вĕрентес ĕçĕн Хисеплĕ ĕçченĕ В.Медведева, Чăваш Республикин тава тивĕçлĕ тренерĕ, судья М.Игнатьев, Чăваш Республикин культурăн тава тивĕçлĕ ĕçченĕ В.Михайлова тата «Авиалесоохрана» учрежденийĕн ертÿçин çумĕ А.Ерицов пулчĕç.
Ял уявĕн концерт программине вырăнти культура ĕçченĕсем хатĕрленĕ. Чăваш чĕлхипе литературине вĕрентекен Н.Сергеева пуçтарăннисене ял историйĕпе паллаштарчĕ. Уяв йĕркелÿçисем çавăн пекех ялти чи çамрăк (Е.Абдинов), чи ватă (А.Шатова, М.Семенов) çынсене тата нумай ачаллă çемьесене (Филипповсен, Петровсен, Мардарьевсен) чысларĕç. Вĕсен ячĕпе вырăнти артистсем сцена çинчен илемлĕ юрăсем шăрантарчĕç.
Уява килнисене вĕри шÿрпепе тата кăпăклă сăрапа сăйларĕç. Çĕрле тăхăр сехет çитеспе сцена çине чăваш эстрада артисчĕсем тухрĕç. Алиса Ахахпи, Константин Рязанов тата Виктория Захарова ял халăхне хăйсен репертуарĕнчи юрăсемпе савăнтарчĕç.