12 мая 2017 г.
Майăн 9-мĕшĕнче пирĕн халăх Тăван çĕршывăн Аслă вăрçинче Çĕнтерÿ тунăранпа
72 çул çитнине анлăн паллă турĕ
Çĕнтерÿ кунĕ - ватăсемпе çамрăксене, çитĕннисемпе ачасене пĕрлештерекен уяв. Кашни çемьен шăпи вăрçăпа çыхăннă. Аслашшĕ-кукашшĕ, ватă аслашшĕпе ватă кукашшĕ е асламăшĕ-кукамăшĕ вăрçăра çапăçса пуç хунă, çĕнтерÿпе таврăннă. Вăрçă асапĕ, пирĕн несĕлсем упраса хăварнă мирлĕ пурнăç пур ăрăва та пĕр тĕвве пуçтарать.
Тăван çĕршыва хаяр тăшманран ирĕке кăларма хутшăннă паттăрсем Канаш енре 15 çын кăна юлнă. Аслă Çĕнтерĕве халалланă уяв митингĕсем районти кашни ялтах чаплă та савăнăçлă лару-тăрура иртрĕç. Ахăртнех, пурин чунĕнче те мăнаçлăх туйăмĕ хуçаланчĕ-тĕр. «Вилĕмсĕр полк» акци пур ял тăрăхĕнче те çынсене йышлă пуçтарчĕ.
Майăн 9-мĕшĕнче «Вилĕмсĕр полк» акцие хутшăнакансем шăп та вунă сехетре Шăхасанти Тĕп лапама çитсе вырнаçрĕç. Уяв программи пуçланчĕ. Митинга район пуçлăхĕ - район депутачĕсен Пухăвĕн председателĕ Иван Иванов тата район администрацийĕн ертÿçи Владимир Степанов уçрĕç.
- Çак уяв пирĕн халăхăн виçесĕр паттăрлăхĕпе хастарлăхне, пысăк хăюлăхĕпе çирĕп чун хавалне тата вăл Тăван çĕршыва хĕрÿллĕн юратнине витĕмлĕн сăнарлакан çутăран та çутă символ пулса тăрать... Ветерансене çитĕнекен ăрăва патриот воспитанийĕ парас, çамрăксен чунĕнче хамăрăн çĕршывпа мăнаçланас туйăма çирĕплетес тата унăн шăпишĕн яваплă пулнине ăша хывма пулăшас тĕлĕшпе тăвакан пархатарлă ĕçшĕн чĕререн тав тăватăп, - терĕ Владимир Николаевич.
ЧР Министрсен Кабинечĕн Председателĕн çумĕ - ял хуçалăх министрĕ Сергей Артамонов, Патшалăх канашĕн депутачĕ Виталий Иванов, «Тăван çĕршывăн ывăлĕсем» обществăлла организаци членĕ Вячеслав Ильин полковник тата ыттисем чĕререн тухакан ăшă сăмахсемпе саламларĕç. Ямаш - Шăхасан маршрутпа ирттернĕ çăмăл атлетика чупăвĕн çĕнтерÿçисене чысларĕç. Районти шкулсенче вĕренекенсен уяв парачĕ иртрĕ. Салтак юррисенчен хатĕрленĕ пысăк концерт пулчĕ.
Фронтра пуç хунă, тылра вăй хунă, вăрçă хыççăн ял-хулана ура çине тăма пулăшнă çынсен ячĕсене нихăçан та манма юрамасть. Пирĕн хамăрăн ачасене, ачасен ачисене вĕсем çинчен каласа кăтармалла. Вара килес ăру та мĕн пĕчĕкрен тăван халăхăн паттăрлăхне, ĕçченлĕхне, мăнаçлăхне ăнланса, туйса ÿсĕ.
Ирина АНДРЕЕВА
Сăн ÿкерчĕкĕ авторăн