АУ «Редакция Канашской районной газеты «Канаш» Мининформполитики ЧувашииОФИЦИАЛЬНЫЙ САЙТ
Орфографическая ошибка в тексте

Послать сообщение об ошибке автору?
Ваш браузер останется на той же странице.

Комментарий для автора (необязательно):

Спасибо! Ваше сообщение будет направленно администратору сайта, для его дальнейшей проверки и при необходимости, внесения изменений в материалы сайта.

Публикации » Турнир 30-мĕш хут иртрĕ

12 мая 2017 г.

Турнир 30-мĕш хут иртрĕ

 Лутрарах, сарлака та çирĕп хул-çурăмлă çынра вăй-хал тапса тăнăн туйăнать. Майăн 5-мĕшĕнче Шăхасанти «Импульс» ача-пăча спорт шкулĕ шăпах çакнашкал кĕрнеклĕ ачасемпе çамрăксене пуçтарчĕ. Кунта СССР тава тивĕçлĕ спорт мастерĕн, Европа, тăватă хутчен тĕнче чемпионĕн, 22-мĕш Олимп вăййисен призерĕн, Халăхсен туслăхĕн орденĕн кавалерĕн Сергей Корнилаев кĕрешÿçĕн парнисене çĕнсе илессишĕн ирĕклĕ мелпе кĕрешекенсен республикăри турнирĕ иртрĕ. Кăçалхипе вăл 30-мĕш хут пулчĕ. Çамрăк спортсменсем Раççейĕн тĕрлĕ кĕтесĕнчен килнĕ: Мускав хулипе облаçĕнчен, Мари Эл, Пушкăртстан, Тутартсан Республикисенчен, Чулхулапа Ульяновск облаçĕсенчен тата, паллах, хамăр республикăн тĕрлĕ районĕпе хулинчен.

Йăлана кĕнĕ спорт уявне уçнă май Сергей Корнилаев, районпа хула администрацийĕсен ертÿçисем Владимир Степановпа Владислав Софронов, Раççей Геройĕ, РФ тава тивĕçлĕ çар летчикĕ Николай Гаврилов, Чăваш Ен физкультурăпа спорт министрĕ Сергей Шелтуков, спорт кĕрешĕвĕн федерацийĕн президенчĕ Владимир Семенов, «Тăван çĕршывăн ывăлĕ- сем» обществăлла организаци правленийĕн членĕ Вячеслав Ильин тата нумай сумлă хăна салам сăмахĕсем каларĕç.

- Пирĕн Канаш çĕрĕ ирĕклĕ мелпе кĕрешекен тĕнче класлă пилĕк спорт мастерне, çирĕм ытла спорт мастерне çитĕнтернĕ. Паян юбилейлă турнир ирттеретпĕр. Вăл çыннăн характерне, сывлăхне çирĕплетме пулăшать, воспитани тĕлĕшĕнчен те пысăк витĕм кÿрет. Пурне те çитĕнÿ тума ăнăçу сунатăп, - терĕ Владимир Николаевич зала пухăннисене саламласа.

- Эпир паян ирттерекен турнира 30 çул каялла сирĕн ентеш, спортсмен, тренер Геннадий Никифорович Смирнов пуçарса янă. Çак тапхăрта мĕн чухлĕ каччăпа хĕр кĕрешÿ спортне суйлса илсе чăн-чăн ăста спортсменсем, чемпионсем пулса тăман-ши? Çамрăк кĕрешÿçĕсем пурте чи малтан çак турнир витĕр тухаççĕ. Геннадий Никифорович ирĕклĕ кĕрешĕве аталантарассишĕн питĕ нумай вăй хунă. Ун чухне паянхи пек условисем те пулман, ачасем çерем çинче кĕрешнĕ, апла пулин те çĕнтерес, малалла аталанас ĕмĕт пысăк пулнă. Вăл пуçарнă, эпир паян тăсакан ырă йăлан кун-çулĕ вăрăм пуласса шанатăп», - терĕ Сергей Корнилаев. Геннадий Никифоровичăн ывăлне - Канашри «Локомотив» физкультурăпа спорт комплексĕн директорне Евгений Смирнова, район администрацийĕн пуçлăхне Владимир Степанова, ытти хăнасене парнепе Хисеп хучĕ парса хавхалантарчĕ. Владимир Николаевич хăй те парăмра юлмарĕ, çитĕнекен ăрăва патриотла воспитани парас, сывă пурнăç йĕркине сарас ĕçре хăйĕн ырă тĕслĕхĕпе палăрнăшăн Сергей Григорьевича Тав çырăвĕ пачĕ.

Пирĕн ентеш, Раççей Геройĕ Николай Гаврилов Аслă Çĕнтерÿ уявĕ умĕн республикăра усăллă та ырă ĕçсем уйрăмах нумай иртнине палăртрĕ. «Малтанхи кун Сител ялĕнче чăвашсен пирвайхи ракетчикĕсене асăнса палăк уçрăмăр. Паян кавирсем çинче хĕрÿ тытăçусем пыраççĕ. Вăйлисен çĕнтермеллех. Ăнăçу сунатăп сире, ачасем! Пысăк çитĕнÿ яланах пĕчĕккинчен пуçланать», - терĕ Николай Федорович. Савăнăçлă пай хыççăн кавирсем çинче ăмăртусем пуçланчĕç. Чи вăйлисем тата çаврăнăçуллисем, паллах, турнир парнисене тивĕçрĕç.

Ирина ВЛАДИМИРОВА

Мой МирВКонтактеОдноклассники

 

Система управления контентом
TopList Сводная статистика портала Яндекс.Метрика