12 мая 2017 г.
Тăван çĕршывăн Аслă вăрçине Çĕнтерÿпе вĕçленĕренпе 72 çул çитнине халалланă митинга Вăтапуç ял тăрăхĕнче халăх йышлăн пуçтарăнчĕ. Мероприяти мирлĕ пурнăçшăн кĕрешсе вăрçă хирĕнче пуçĕсене хунă вырăнти паттăрсене асăнса лартнă обелиск çумĕнче иртрĕ. Митинга ял тăрăхĕн пуçлăхĕ Ираида Петрова уçрĕ. Вăрçă ветеранĕсен ачисемпе мăнукĕсене, тыл ĕçченĕсемпе вăрçă ачисене Çĕнтерÿ кунĕ ячĕпе район администрацийĕн АПК организацийĕсемпе çыхăнса ĕçлекен пайĕн тĕп эксперт специалисчĕ Сергей Васильев, ял тăрăхĕнчи депутатсен пухăвĕн председателĕ Валентина Лукина, Вăтапуç салин старости Виталий Андриянов, вырăнти ветерансен канашĕн председателĕ Нина Шемякина, Вăтапуç шкулĕн директорĕ Алексей Федотов тата ыттисем саламларĕç.
Çĕнтерÿ кунне халалланă парада шкулта вĕренекенсем хутшăнчĕç. Вĕсем обелиск çумне чечек кăшăлĕсем, гирляндăсем хучĕç. «Колокольчик» ача садне çÿрекенсем те айккинче юлмарĕç, пĕчĕкскерсем вăрçă вăхăтĕнче çырнă юрăсене юрларĕç, сăвăсем каларĕç, ташăсем ташларĕç.
Тăван çĕршывăн Аслă вăрçине Вăтапуç ял тăрăхĕнчен 310 салтак тухса кайнă, вĕсенчен 167-шĕ - Вăтапуçĕнчен, 65-шĕ - Кайăкялĕнчен, 78-шĕ - Çатăркаçырминчен. Тăшмана хирĕç тăнă ентешсенчен 209-шĕ вăрçă хирĕнчен таврăнайман. Фронтра пуç хунă тата каярах суранĕсене пула пурнăçран уйрăлса кайнă салтаксене асăнса митинга хутшăннисем пĕр минут шăп тăчĕç.
Митинг вĕçленсен ĕçпе тыл ветеранĕсене тата хăнасене шкул столовăйĕнче салтак пăттипе сăйларĕç.
Юрий НИКИТИН,
обществăлла корреспондент