05 мая 2017 г.
Иртнĕ кĕçнерникун Сиккассинчи Культурăпа кану çурчĕ хăнасемпе, куракансемпе лăк тулчĕ. Сăлтавĕ - ялти культура учрежденийĕ - 50 çул, халăх хорĕ 90 çул тултарнине уявлани. Фойере ял тăрăхĕнчи ал ĕç ăстисен капăр япалисен куравĕ, залра тăван çут çанталăк асамлăхне, Сиккасси енчи çемьесен пурнăçне çутатса паракан фотовыставкăсем куракансене хăйсен илемĕпе тыткăнларĕç. «Ку картинăсене интернетран илнĕ-и вара; - терĕ пĕри тĕлĕнсе. - Ара, мĕн, хамăр ялсене те паллаймарăним, улăх-çаранĕ, йăмри-хурăнĕ те хамăрăнах-çке», - ăнлантарчĕ тепри. Иккĕмĕш хутра РФ культурăн тава тивĕçлĕ ĕçченĕн, халăх академикĕн Николай Бабановăн картинисемпе паллашма май пулчĕ.
Савăнăçлă уяв каçне район администрацийĕн пуçлăхĕ Владимир Степанов уçрĕ. 50 тата 90 çул тултаракан сумлă «юбилярсене» саламласа ăшă сăмахсем каларĕ, малашне те пысăк çитĕнÿсемпе ĕçлесе пыма ырă сунчĕ, коллектива 30 пин тенкĕлĕх сертификат парнелерĕ. Вырăнти культура ĕçченĕсене, Халăх хорĕн хастар участникĕсене район администрацийĕн Хисеп хучĕпе чысларĕ.
ЧР культура, национальноçсен ĕçĕсен тата архив ĕçĕн министрĕн çумĕ Анатолий Тимофеев сиккассисем район ятне республикăра, республика ятне ытти регионсенче чыслăн хÿтĕленине палăртрĕ. Культура аталанăвне пысăк тÿпе хывнăшăн Ирина Андреевăна министерствăн Тав çырăвĕпе, Халăх хорĕн хормейстерне Алексей Мурзукова Хисеп хучĕпе наградăларĕ. Республикăри халăх пултарулăх центрĕн методисчĕ Вера Васильева Хисеп хучĕпе пĕрле термопост парнелерĕ.
Сиккассинче çуралса ÿснĕ, ăслăлăхпа культура анинче тава тивĕçлĕ ĕçсем тунăшăн пысăк сум çĕнсе илнĕ Юрий Артемьев профессор, филологи наукисен докторĕ тата Чăваш Республикин халăх артисчĕ, театр деятелĕсен Союзĕн председателĕ Геннадий Медведев тăван ялта иртнĕ вăхăтсене, клуб сцени çине тухса хăйсен пултарулăхне пĕрремĕш хут халăха кăтарнисене хавхаланса аса илчĕç. Биологи ăслăлăхĕсен докторĕ Кузьма Захаров (Çĕнĕ Шелттемрен), поэт-прозаик, ЧАССР культурăн тава тивĕçлĕ ĕçченĕ Анатолий Кипеч, «Канашсем» ентешлĕхĕн ертÿçи Юрий Тарасов, район депутачĕсен Пухăвĕн депутачĕ Евгений Поверный, Сиккасси ял тăрăхĕн пуçлăхĕ Наталия Вазинге, ялти Культура çуртне тутарнă тата ăна нумай-нумай çул ертсе пынă РФ культурăн тава тивĕçлĕ ĕçченĕ Николай Бабанов 50-90 çул пĕр сÿнми ялкăшакан культура вучахĕ çинчен чуна хускатакан ăшă сăмахсем каларĕç. «Сиккассинчи Культура çурчĕ шанчăклă алăра пулнăшăн питĕ савăнатăп», - терĕ Николай Михайлович. Культура çурчĕ ялăн чунĕпе чĕрийĕ.
Культура çурчĕ - ял халăхĕн юратнă вырăнĕ. Кунта ватти те, вĕтти те хаваспах килеççĕ. Пĕччен те, çемьепе те, класпа та. Килеççĕ те - культура çурчĕпе яланлăхах туслашаççĕ. Культура çурчĕн мухтавĕ - Халăх хорĕ. Вăл Пĕтĕм Раççейри «Çĕнтерĕве салют» фестивальте икĕ хутчен лауреат пулса тăнă, унсăр пуçне республикăра, ун тулашĕнче иртекен конкурссемпе фестивальсенче миçе хутчен мала тухнин шучĕ те çук! Хор хăйĕн пултарулăхĕпе Мускав халăхне те тĕлĕнтернĕ. Ăна тĕрлĕ çулсенче Михаил Мурашкин, Дария Шоркина, Василий Мурзуков, Таисия Шоркина, ЧР культурăн тава тивĕçлĕ ĕçченĕсем Валентин Кузнецов, Роза Шоркина, Сергей Шпаков ертсе пынă. Хальхи вăхăтра вĕсен пархатарлă ĕçне Алексей Мурзуков талантлă специалист тăсать. Юбилей каçĕнче те хор куракансене илемлĕ юрăсем парнелерĕ.
Уява пĕтĕмлетме Культура çурчĕн директорĕ Ирина Андреева сăмах илчĕ. Залри кашни çын валлиех тивĕçлĕ хаклав тупăнчĕ унăн. Ирина Анатольевна район администрацийĕн пуçлăхне Владимир Степанова, культура секторĕн заведующине Вероника Павловăна, ял тăрăхĕн администрацийĕн (ертÿçи Наталия Вазинге), вăтам шкулăн (директорĕ Марианна Михайлова), «Хурăн» ача-пăча сачĕн (заведующийĕ Татьяна Александрова), Сиккассинчи пĕтĕмĕшле практика врачĕн офисĕн коллективĕсене, Наталия Горшкова, Елена Павлова, Елена Дмитриева, Лидия Антонова вĕрентекенсене, Николай Горшков художника, «Мир» ЯХПК ООО ертÿçине Надежда Козловскаяна, «АСК-Яльчики» ОООн генеральнăй директорне Хасият Идиатуллина, Руслан Сергеев, Марина Яковлева, Антон Игнатьев предпринимательсене, Людмила мурзуковăна, Валентина ендеровăна, культура ĕçченĕсене чĕререн тав турĕ, çемьере, ĕçре ăнăçу сунчĕ.
Ирина ВЛАДИМИРОВА
Сăн ÿкерчĕкĕсем авторăн