22 марта 2017 г.
Крым çур утравĕ Раççее çĕнĕрен таврăннăранпа - 2014 çулхи пуш уйăхĕн 18-мĕшĕнчен вара - виçĕ çул çитрĕ, ку тапхăрта ырă пулăм самай пулчĕ. Пĕтĕм Раççейри «Эпир пĕрле!» акцие Чăваш Енре пурăнакан 5 пин ытла çын хутшăнчĕ.
Пĕтĕм Раççей шайĕнче иртнĕ чаплă пулăма Чăваш Республикин Министрсен Кабинечĕн Председателĕн çумĕ – Чăваш Республикин Пуçлăхĕн Администрацийĕн Ертÿçи Юрий Васильев, «Единая Россия» Пĕтĕм Раççейри политика пар- тийĕн регионти уйрăмĕн секретарĕ, Чăваш Республикин Патшалăх Канашĕн депутачĕ Николай Малов, Шупашкар хула ертÿлĕхĕ, обществăлла организацисем, тĕрлĕ парти представителĕсем, социаллă сферăра вăй хуракансем, студентсем, пĕр сăмахпа, мĕнпур халăх уява хапăл туса пуçтарăнчĕ.
«Пирĕн пата виçĕ çул каялла «Çурхи Крым» çитрĕ. Историри чăнлăха çирĕплетсе пачĕ. Пирĕн истори хăватлă. Йăла-йĕрке пуян. Пуласлăх пысăк. Эпир унпа мăнаçланма тивĕç», - тенĕ Николай Малов хăйĕн сăмахĕнче.
Чăваш Ен Обществăлла палатăн председателĕ Алексей Судленков хăйĕн саламĕнче Крымпа, Раççейĕн Тинĕс-çар флочĕпе, хамăрăн вăйлă çĕршывпа мăнаçланнине палăртнă.
Биатлон енĕпе тăватă хутчен Олимп чемпионĕ, легендарлă биатлонист Александр Тихонов хăйĕн сăмахĕнче республика спорт çитĕнĕвĕсемпе тĕнче шайĕнче чапа тухнине асăннă. Татьяна Акимован çитĕнĕвĕсем пирки тепĕр хут савăнса пĕлтернĕ. «Паян çав тери пысăк пĕлтерĕшлĕ уяв. Крым Раççейпе пĕрле. Раççей тĕрлĕ халăхлă никама парăнман çĕршыв пулса тăчĕ!» - тенĕ вăл.