17 марта 2017 г.
Пĕрлехи информаци кунне хальхинче района Чăваш Енĕн конкурентлă политикăпа тарифсен патшалăх службин ертÿçи Марина Кадилова ертсе пыракан ушкăн килчĕ. Ку йышра республикăн çут çанталăк ресурсĕсемпе экологи министрĕн çумĕ Татьяна иванова, Патшалăх Канашĕн депутачĕ, «Чувашхлебопродукт» акционер обществин генеральнăй директорĕ Владимир Яковлев, «Хыпар» хаçатăн тĕп редакторĕн çумĕ Дмитрий Моисеев пулчĕç.
Район администрацийĕн пуçлăхĕ Владимир Степанов тата Марина Кадилова Ăвăспÿрт Кипеч тата Хучел ял тăрăхĕсенче пурăнакансемпе тĕл пулчĕç. Информкун темисемпе килĕшÿллĕн калаçу çурхи уй-хир ĕçĕсене хатĕрленсе ирттересси, çул-йĕр строительствипе юсав ĕçĕсем, пушар хăрушсăрлăхĕпе тивĕçтерессипе çыхăннă мероприятисене пурнăçласси, шыв-шур тата тавралăха тирпей-илем кĕртессипе çыхăннă тапхăрсене хатĕрленесси, спутник çыхăнăвĕпе Чăваш наци телевиденийĕ кăтартма пуçлани, «Ачалăх ячĕпе ачалăхшăн» ыр кăмăллăх марафонне ирттересси çинчен пычĕ.
Кăçал районта акакан лаптăксем 36,07 гектар йышăнмалла. Çур аки валли 2859 тонна вăрлăх хатĕрленĕ. «Россельхозцентрăн» вырăнти пайĕ пĕлтернĕ тăрăх, паянхи куна хуçалăхсем 2809 тонна вăрлăха тĕрĕслеве тăратнă. Çак шутран 2312 тонни - кондицие ларнă вăрлăх, 497 тоннине тасатса çитермен. Хальхи вăхăтра хуçалăхсенче вăрлăх алласа тасатассипе ĕçлеççĕ.
Ака ирттерме 1100 тонна минерал удобренийĕсем кирлĕ. Мартăн 6-мĕшĕ тĕлне ăна 625 тонна кÿрсе килнĕ. Çунтармалли-сĕрмелли материалсемпе 100 проценчĕпех тивĕçтернĕ: дизель топливи 600 т, бензин 86 т, дизель çăвĕ 10 т пур.
Районти çĕр ĕçченĕсем кăçал хăйсен умне 32,3 пин тонна тыр-пул, 3,4 пин тонна çĕр улми туса илме тĕллев лартаççĕ.
Район пĕлтерĕшлĕ çулсене юсама 2017 çулта бюджетра 19657,7 пин тенкĕ пăхса хăварнă. Кăçал «Çĕрпÿ - Ульяновск» - Çĕнĕ Шелттем - Кивĕ Шелттем, «Аниш» - Вăрăмпуç - Пĕршенер автоçулсене юсама палăртнă. Ку ĕçсене «Транспортник» подряд организацийĕ тăвĕ. Районăн çул-йĕр фончĕ - 53529,3 пин тенкĕ. Ял тăрăхĕсенчи çулсене тытса тăма тата юсама 17680,8 пин тенкĕ уйăрнă, вĕсенчен 4635,2 пин тенки республика бюджетĕнчен, 13045,6 пин тенки ял тăрăхĕсен бюджетĕнчен.
Информушкăн членĕсем ял çыннисене «Триколор-ТВ» спутникăн 823-мĕш кнопки çинче Чăваш наци телевиденийĕ кăтартма пуçланине тепĕр хут аса илтерчĕç.
Конкуренлă политикăпа тарифсен патшлăх службин ертÿçи Марина Кадилова республикăра «Ачалăх ячĕпе ачалăхшăн» марафон старт илни çинчен каларĕ. Ыр кăмăллăх акцине пирĕн республикăра 20 çул хушши йĕркелеççĕ. Юлашки виçĕ çулта кăна йывăр условисенче пурăнакан ачасене пулăшма 25 миллион тенкĕ пухма пултарнă. Иртнĕ çул республикăра пурăнакансем марафон пухмачне 7 млн та 800 пин тенкĕ хывнă.
Тĕлпулура ял çыннисем хăйсене канăç паман ыйтусене - шыв башнине тытса тăрасси, пĕвесене, кÿлĕсене тасатасси - хускатрĕç. Вĕсенчен нумайăшне вырăнтах татса пама пулать. Кăçал Ăвăспÿрт Кипеч тĕп шкулĕн мастерской çуртĕн- че клуб тума палăртнă.
- Ырă йăласене чĕртсе тăратмалла. Ялти çынсем нимелле ĕçлеме манман-ха, вĕсене вырăнти ĕçсене явăçтармалла. Ырă тĕслĕхсем хамăр районтах темиçе те. Акă, сăмахран, Мăкăр ялĕнче активлă çынсем пуçарнипе парк уçнă, клуб тăррине çĕнетнĕ, шалти ĕçсене те хăйсемех тăваççĕ. Районта иртнĕ «Урă ял» конкурсра çĕнтерсе мăкăрсем 50 пин тенкĕ премие тивĕçрĕç. Культура та аталанса пырать: ялта пурăнакансем фольклор коллективĕ йĕркеленĕ, сцена çине тхмалли капăр тум çĕлеттернĕ. Хăйсене хăйсем хавхаланса ĕçлеме пултараççĕ. Шелттемре те, ытти ялсенче те ырă пуçарусем чылай, - терĕ Владимир Николаевич калаçăва пĕтĕмлетсе. Ăвăспÿрт Кипечрен çул Хучеле выртрĕ.
Ирина АНДРЕЕВА