10 марта 2017 г.
Соколов Мишша тесен ăна Сиккассинче те, Яманкассинче те, Маякпа Шелттемре те, Кашкăрçырминче те пĕлекен-паллакан нумай.
Михаил Соколов Сиккасси салинче 1957 çулхи мартăн 11-мĕшĕнче çуралнă. Ялти вăтам шкула вĕренсе пĕтернĕ. Икĕ çул Чехословакире хĕсметре тăнă. Салтакран таврăнсан каччă ПАТПна водителе ĕçе вырнаçнă. Каярахпа Канашри механизациленĕ вăрман хуçалăхне куçнă. Куçăмсăр йĕркепе Улатăрти вăрман хуçалăх техникумĕнчен вĕренсе тухнă.
- Михаил Сергеевич Канаш вăрман хуçалăхĕнче малтан водительте вăй хучĕ. Унтан нумай çул лесникра чунне парса ĕçлерĕ. Плансене ялан тултаратчĕ, коллективра ун пирки ÿпкелешсе калаçни пĕрре те пулман. Кайран Йĕпреç вăрман хуçалăхĕнче мастер пулса тăрăшрĕ. Михаил Сергеевич хăйне кирек мĕнле ĕç хушсан та ăна пурнăçланине, çын шанăçне тÿрре кăларнине çирĕплетсех калатăп, _ тет Канаш вăрман хуçалăхĕн ĕçченĕ Николай Мурашкин хăйĕн ентешне хисепленине палăртса.
Соколовсем, Михаил Сергеевичпа Елена Ивановна, ывăлпа хĕр çуратса ÿстернĕ, вĕсене тĕрĕс воспитани панă, пурнăçăн анлă çулĕ çине кăларнă. Ывăлĕ Сергей нумай çул хамăр районти шалти ĕçсен пайĕнче следовательте ĕçлерĕ. Ун пирки ырласа каланине пĕрре мар илтнĕ. Халĕ Сергей Михайлович Тăвай районĕн шалти ĕçсен пайĕн сотрудникĕ, майор. Хĕрĕ Мария Шупашкарти пĕр шкулта ачасене историпе обществознани вĕрентет. Виçĕ мăнукĕшĕн чун-чĕре юратăвне хĕрхенмеççĕ кукаçипе кукамай, асаттепе асанне.
Ыран вара Михаил Сергеевичăн пурнăçĕнче питех те паллă кун - ачисем, мăнукĕсем, мĕн пур çывăх тăванĕ, кÿрши-арши ăна 60 çулхи юбилей ячĕпе саламлама пуçтарăнаççĕ. Вĕсен йышĕнче, паллах, Стекольщиковсем, Мельниковсем, Арефьевсем, Димитриевсем, Бельскисем, Козловсем, Горячкинсем, Чулаховсем, Филипповсем те пулĕç. Юратнă та хаклă çыннине вĕсем ăшă та çепĕç сăмахсемпе хаçат урлă та саламлаççĕ. Вăрăм пултăр Сирĕн ĕмĕрĕр, хурçă пултăр ялан сывлăхăр.
Ирина АНДРЕЕВА
-