10 марта 2017 г.
Чăваш наци конгресĕ йĕркеленипе «Чăваш тумĕ - халăх пуянлăхĕ» регионсем хушшинчи конкурсăн районсенче иртекен тапхăрĕ хĕрсе пырать.
Пуш уйăхĕн 6-мĕшĕнче Вырăскас Пикших Культура çуртĕнче иртнĕ уяв пурне те хăйĕн анлăшĕпе, пуянлăхĕпе савăнтарчĕ. Пирĕн районти культура ĕçченĕсем, ĕçе яланах тĕплĕ тăваканскерсем, ку хутĕнче те конгресс хастарĕсене хăйсен пултарулăхне, тăрăшулăхне уççăн кăтартса пачĕç. Ĕçе районти фольклор ушкăнĕсене явăçтарма пĕлни, халăха тăван культурăпа кăсăкланма хăнăхтарни куç кĕрет кунта.
Канаш районĕнчи пур ялтан та тенĕ пек авалхи, асатте-асанне арчисенчи чăваш çи-пуçне пуçтарма май килнĕ. Хĕрарăмсемпе арçынсен авалхи пир кĕписем, сурпансем, хуçалăхра усă курнă савăт-сапа тата ытти япала фойери курава вырнаçнă. Уйрăмах куравра ĕлĕкхи хушпусем тата хальхи вăхăтра ăсталанă хушпусемпе тухьясем савăнтарчĕç. Экспонатсене ялсенчен килнĕ фольклор ушкăнĕсем авалхи юрăсем юрласа пуянлатрĕç, куракансене тĕлĕнтерчĕç.
Чăваш наци конгресĕн хастарĕсем – жюри пайташĕсем - Чăваш Республикин культурăн тава тивĕçлĕ ĕçченĕ, Чăваш патшалăх культурăпа ÿнер институчĕн доценчĕ, халăх ăстисен ассоциацийĕн ертÿçи Зинаида Ивановна Воронова тата Чăваш наци конгресĕн культура комитечĕн членĕ, Чăваш патшалăх культурăпа ÿнер институчĕн кафедра ертÿçи Раиса Михайловна Васильева Шупашкар хулинчен килсе çитрĕçĕ Вĕсем куравпа паллашрĕç, уяв çав тери кăсăклă пулнине палăртрĕç.
Конкурса пурĕ 16 ăмăртакан хутшăнчĕĕ Кашни конкурсантăн сăмахне фольклор ушкăнĕсем халăх юррисемпе илемлетрĕç.
ЧНК жюри пайташĕ, çак конкурса пуçаракан Зинаида Воронова канашсене уява пуян та кăсăклă йĕркеленĕшĕн чунтан тав турĕ. Çак уяв программипе канашсен 16 конкурсĕнче те Шупашкара, регионсем хушшинче иртекен ăмăртăва. кайма тивĕçрĕ тесе палăртрĕ.
Зоя НИКОЛАЕВА,
районти Культура çурчĕн информаципе методика пайĕн заведующийĕ