03 марта 2017 г.
_Preview.jpg "Пархатарлă ĕçне орден-медальпе хакланă")
Тăрăнта пурăнакан Мария Ивановна Александрова 1932 çулхи февралĕн 9-мĕшĕнче çуралнă. Ашшĕ Иван Николаевич Николаев ку ял çынниех пулнă. Амăшĕ, Пелагея Семеновна Семенова, Çĕнĕ Шуртантан.
Иван Николаевич вăрçа кайиччен колхозра ĕçленĕ. 1924-1926 çулсенче çар службинче пулнă. Салтакран таврăнсан Молотов ячĕллĕ колхозра счетоводра, хуçалăх заведующийĕнче ĕçленĕ, уй-хир бригадине ертсе пынă.
1942 çулхи январь уйăхĕнче Иван Николаевич каллех салтак тумĕ тăхăннă. Ял-йыш ăна фронта ăсатнă. Пирĕн ентеше Мускав облаçĕнче тăракан 687-мĕш стрелковăй полкăн взвод командирĕн пулăшуçине лартнă. Вăрçăран Иван Николаевич 1943 çулхи август уйăхĕнче аманса таврăннă.
Мария Ивановнăн амăшĕ питĕ ир çĕре кĕнĕ. Виçĕ ачи, Праски, Марье тата Наçтуç, амăшĕн ăшшисĕр тăрса юлнă. М.Александрова ултă çултах шкула кайнă. Çĕнĕ Мами шкулĕнче 7 класс вĕренсе пĕтернĕ. Вара ялта сад бригадинче ĕçлеме пуçланă, унта арпуссем те лартса ÿстернĕ.
1954 çулхи июль уйăхĕнче Мария Ивановна Çĕнĕ Мами яшне Иван Александрова качча тухнă. Мăшăр сакăр ачана çутă кун парнеленĕ, пурнăç çулĕ çине кăларнă. Ачасене шкула çÿреме меллĕ пултăр тесе çемье Тăрăн ялне куçса килнĕ. Хăйсем колхоз ĕçĕнчен пĕр кун юлмасăр ĕçленĕ: торф кăларнă, уйра çурлапа тырă вырнă, кĕлте турттарнă, авăн çапнă, вăрман каснă, фермăра та вăй хунă.
Пархатарлă ĕçĕшĕн, тăрăшулăхĕшĕн Мария Ивановнăна медальсемпе чысланă, «Ача амăшĕн мухтавĕ» орденăн 2-мĕш тата 3-мĕш степенĕсемпе наградăланă. Александровсен хĕрĕ Елена Ивановна 1986-2001 çулсенче Пайкилт ял администрацийĕн секретарĕнче ĕçленĕ, 2001-2006 çулсенче ял администрацийĕн председателĕ пулнă. Паян кинемей ачисемпе ырă курса пурăнать. Унăн 10 мăнук тата 8 кĕçĕн мăнук.
Михаил НИКОЛАЕВ,
Пайкилт ял тăрăхĕн ветерансен канашĕн председателĕ