15 февраля 2017 г.
Эрнекун Çеçпĕл Мишши ячĕллĕ Шăхасан вăтам шкулĕнче районăн социаллă пурнăçĕпе экономика аталанăвĕнчи 2016 çулхи кăтартăвĕсене пĕтĕмлетрĕç, муниципалитетăн малашлăх тĕллевĕсене палăртрĕç. Канашлу ĕçне Чăваш Ен Пуçлăхĕ Михаил Игнатьев, министерствăсен представителĕсем, республикăн Патшалăх Канашĕн депутачĕсем Кияметдин Мифтахутди-новпа Виталий Иванов, предприятисемпе организацисен, учрежденисен ертÿçисем, ветерансем, район çыннисем хутшăнчĕç.
Шкулăн фойинче хăнасене Сиккассинчи Мурзуковсен çемйи купăс каласа-юрласа кĕтсе илчĕ. Шкул ачисем ăсталанă ал ĕçĕсен выставки интереслĕ иртрĕ. Павел Семенов фермер хуçалăхĕ улма-çырла, виноград, пахча çимĕç сорчĕсене кăтартма пысăк курав йĕркеленĕ. Николай Семенов фермер хуçалăх ĕçĕ-хĕлĕпе, кăçал пурнăçламалли ĕçсемпе тĕплĕн паллаштарчĕ. Канаш районĕ 90 çул тултарнине халалланă стендсем, хамăр тăрăхри вăрăм ĕмĕрлĕ çынсене, нумай ачаллă çемьесене, ĕç династийĕсене çутатса паракан пурнăç йывăçĕ хăйне евĕрлĕхпе тыткăнларĕç.
Республика Пуçлăхĕ Михаил Игнатьев район пуçлăхĕпе Иван Ивановпа тата райадминистраци ертÿçипе Владимир Степановпа ирттернĕ ĕçлĕ тĕлпулу вăхăтĕнче район хăйĕн умне мĕнле тĕллевсем лартнине сÿтсе яврĕç. Чăваш Республикин влаç органĕсемпе çыхăнса ĕçленине пула муниципалитет район çыннисене панă сăмаха пурнăçлама пултарнине палăртрĕ Михаил Васильевич. 2016 çулта районта 200 миллион тенкĕлĕх проектсем пурнăçланă. Ĕçсем кăçал малалла тăсăлĕç.
«Ку енĕпе ĕçе вăйлатмаллине эпир лайăх ăнланатпăр. Ял хуçалăх отраслĕнче ĕç укçин вăтам виçине 17 пин тенке çитермелле. Ку задачăна пурнăçлама пулать», - терĕ Владимир Степанов.
Регион ертÿçи ку çул Раççейре Экологи, Чăваш Енре Амăшĕпе Ашшĕн çулталăкĕ пулнине палăртрĕ. «Канаш районĕ хăватлă, ĕçлеме пултаракан муниципалитет, анчах çитменлĕхсем те пур. Вĕсене пĕтерсен социаллă пурнăçпа экономика аталанăвĕнче район пысăк ÿсĕмсем тума пултарать», - терĕ Михаил Васильевич.
Район администрацийĕн ертÿçи Владимир Степанов 2017 çулта муниципалитета аталантармалли енсене палăртрĕ. Темиçе инвестици проектне пурнăçа кĕртмелле. Çав шутра «Пионер» агрофирмăра 400 ĕне вырăнлăх ферма, «Канмаш» агрофирмăра тырă тасатмалли тата типĕтмелли комплекс, Марат Камальтдинов уйрăм предпринимателĕн мăйракаллă шултра выльăх пусса тирпейлемелли комплекс тумалла.
Чăваш Ен Правительствин Председателĕн çумĕ - финанс министрĕ Светлана Енилина каланă тăрăх, район бюджетне харпăр хăй тупăшĕнчен укçа сахалрах кĕнĕ. Çавна май Светлана Александровна пĕрлехи хыснан тупăш пайне 2017 çулта 5,8 процент пысăклатма задача лартрĕ.
Патшалăх Канашĕн депутачĕ, «Газпром межрегионгаз Чебоксары» ООО генеральнăй директорĕ Кияметдин Мифтахутдинов республика программипе килĕшÿллĕн 2017 çулта çĕнĕ культура çурчĕ хăпартса хута ярасси пирки каларĕ. «Паян пысăках мар ял клубĕсем те аван ĕçлеççĕ. Шупашкар районĕнче лайăх тĕслĕх пур. 1,5-2 миллион тенкĕпе тунă пĕчĕк клубсенче те ĕç вĕресе кăна тăрать. Кунашкал практикăна республикăри ытти муниципалитетсенче усă курсан та аван пулмалла. Вара ял та пурăнать», - терĕ Кияметдин Садыртдинович. Чăваш Республикин Патшалăх Канашĕн депутачĕ, «Канаш районĕн БТИ» предприяти директорĕ Виталий Иванов хастар çынсен шухăшĕсене пурнăçа кĕртме бюджетран укçа-тенкĕ уйăрма пултарассине палăртрĕ. Тăван тавралăха илемлĕрех тăвас тесен кашни çыннăн çине тăрса ĕçлемеллине каларĕ.
«Районти влаçсен ял тăрăхĕсене аталантарассипе çыхăннă ыйтусене май пур таран пĕрле пăхса тухса татса пама тăрăшмалла. Хăйсен тăван тăрăхĕ, ялĕ республикăри чи илемлĕ вырăн пултăр тесе тăрăшакансем, чăнах та, пулăшăва тивĕçĕç. Эпир эффективлă ĕçлекен, ял çыннисемпе организацисен пуçарăвĕсене хÿтĕлеме пултаракан ял тăрăхĕсене малашне те пулăшса пырăпăр», - палăртрĕ Михаил Игнатьев.
Кун йĕркинчи тепĕр ыйту Амăшĕпе Ашшĕн çулталăкне халалласа ирттермелли ĕçсем пирки пулчĕ. Чăваш Енре çемьесем арканнин тĕп сăлтавĕсенчен пĕри - алкоголизм. «Çынсене эрех-сăра сиенĕ çинчен тĕплĕ ăнлантармалла. Аслисен йăнăшĕсемшĕн ачасем шар ан курччăр. Çемье хаклăхне упрама пĕлмелле», - терĕ республика ертÿçи. Чăваш Ен Пуçлăхĕн ятарлă стипендине тивĕçнĕ çамрăксене - свидетельство, нумай ачаллă çемьесене парнесем пачĕç.
Çак кунах хăнасем «Космонавт» ача-пăча кану лагерĕнче пулса организацин ĕçĕпе интересленчĕç. Спортпа туслă çемьесемпе, ачасемпе тĕл пулса калаçрĕç. Михаил Игнатьев регионта халăха спортпа туслашма лайăх условисем туса панине асăнчĕ. «Пирĕн спортсменсем тĕнче шайĕнчи ăмăртусенче пысăк çитĕнÿсем тăваççĕ. Татьяна Акимова Тĕнче чемпионатĕнче биатлон енĕпе Раççей командин йышĕнче «бронза» медале тивĕçрĕ. Çĕнĕ Шупашкарта çуралса ÿснĕ Дмитрий Кириллов Пĕтĕм тĕнчери хĕллехи Универсиадăра «ылтăн» медаль çĕнсе илчĕ. Ачасене тĕрĕс воспитани парса ÿстернĕшĕн ашшĕ-амăшне пысăк тав», - терĕ Михаил Васильевич.
Антонина ТЯМИНА