17 февраля 2017 г.
2011 çултанпа нарăс уйăхĕн 15-мĕшĕнче Тăван çĕршыв тулашĕнче служба тивĕçне пурнăçласа пуç хунă Раççей салтакĕсене асăнаççĕ. Тăван çĕршывăн Аслă вăрçи чарăннă хыççăн пирĕн çĕршыв ытти патшалăхра пыракан 30 ытла вăрçа хутшăннă. Вĕсенче 25 пин ытла çар çыннин пурнăçĕ вăхăтсăр татăлнă. Чи хăрушши - пирĕн паттăрсене Афганистанра кĕтнĕ. Вĕсем ют çĕршыв çĕрĕ çинче, сăрт-ту хушшинче, чăтмалла мар шăрăхра тата тĕттĕм сивĕ каçсенче Тăван çĕршыв интересĕсене хÿтĕленĕ.
Совет çыннисен çемйине «Афганистан» ăнлав 1979 çулхи раштав уйăхĕнче кĕнĕ, çав тапхăртанпа тăван тăрăха салтаксен вилнĕ хучĕсем, цинк тупăксем тата аманса сусăрланнă яшсем таврăнма тытăннă. Афган вăрçинче Канаш хулипе районĕнче çуралса ÿснĕ 18 каччăн пурнăçĕ вăхăтсăр татăлнă, пĕри хыпарсăр çухалнисен йышĕнче.
Кăçал Совет çарĕсене Афганистанран илсе тухнăранпа 28 çул çитрĕ. Çакна халалласа Канашри Культура керменĕнче салтак юррисен фестивалĕ иртрĕ, унта çулсеренех хулари пултарулăх ушкăнĕсем хутшăнаççĕ.
Хăнасен йышĕнче Чăваш Ен Патшалăх Канашĕн депутачĕ Виталий Иванов, Чăваш Республикин информаци политикин тата массăллă коммуникацисен министрĕ Александр Иванов, хула администрацийĕн пуçлăхĕ Владислав Софронов, Канаш хулин, Канаш тата Тăвай районĕсен çар комиссарĕ Юрий Барышов пулчĕç. Афганистан ветеранĕсен союзĕн председателĕ Герман Николаев çар тусĕсене саламларĕ, вĕсене орден-медальпе наградăларĕ.
Артемий МЯСНИКОВ
Сăн ÿкерчĕкĕ авторăн