25 января 2017 г.
Çулленех январĕн 23-мĕшĕнчен пуçласа февралĕн 23-мĕшĕччен районта çарпа патриотизм уйăхлăхĕ иртет. Кăçал вăл Пĕтĕм Раççейри ачасемпе çамрăксен «Юнармия» çарпа патриотизмăн обществăлла юхăмĕн вырăнти уйрăмне йĕркеленипе пуçланчĕ. Асăннă организаци пирĕн районта шăп та лăп январĕн 23-мĕшĕнче çуралчĕ. Район администрацийĕн ларусен залĕнче 25 вĕренекене савăнăçлă лару-тăрура çамрăк армеецсен ретне илчĕç. Çак йышра Ухман, Раççей Паттăрĕ Н.Ф. Гаврилов ячĕллĕ Янкăлч, Энтрияль вăтам шкулĕсен тата А.Я.Яковлев ячĕллĕ Ăвăспÿрт Кипеч тĕп шкулĕн ачисем пулчĕç.
Район администрацийĕн пуçлăхĕ Владимир Степанов, Канаш хулин, Канаш тата Тăвай районĕсен çар комиссарĕ Юрий Барышов, çар комиссарĕн çумĕ Сергей Желудков, Раççей ДОСААФĕн Канашри автошкулĕн директорĕ Валерий Анисимов, вĕренÿ управленийĕн ертÿçи Юрий Алексеев çамрăк армеецсене тăрăшса вĕренме, спортпа туслă, çирĕп сывлăхлă та хăюллă пулма сунчĕç.
Аслă юлташĕсен ырă сунăмне ăша хывнă çамрăксем пурин умĕнче те Тăван çĕршыва юратма, устава пăхăнма, юлташа йывăрлăхра пулăшма, вĕренÿре те, спортра та çитĕнÿсем тума, паттăрсен ятне асра тытма, Тăван çĕршыв чăн-чăн гражданинĕ, патриочĕ пулма тупа турĕç.
Владимир Николаевичпа Юрий Витальевич ачасене çамрăк армеец пулнине ĕнентерекен значок çакрĕç.
Ирина АНДРЕЕВА
Сăн ÿкерчĕкĕ авторăн