20 января 2017 г.
Йĕлтĕрпе чупассипе район, республика ăмăртăвĕсемпе турнирĕсем Василий Агусевсăр интерессĕр иртнĕ пулĕччĕç. Василий Петровичшăн спортăн чи юратнă тĕсĕ - йĕлтĕрпе чупасси. Ветерансем хушшинче иртекен ăмăртусенче вăл тăтăшах малти вырăнсене йышăнать. Йĕлтĕр йĕрĕ ăна Яманкасси шкулĕнче вĕреннĕ чухнех илĕртнĕ.
Василий Петрович нумай çул «МРКС Волги» - «Чувашэнерго» производство пĕрлешĕвĕн Кăнтăр электричество сечĕсен уйрăмне ертсе пырать, хăйĕн ĕçне тÿрĕ чунпа туса пырать. Ку организацире вăй хуракансем те ертÿçине кура спортпа туслă.
Çак кунсенче В.Агусева çуралнă кун ячĕпе район администрацийĕн пуçлăхĕ Владимир Степанов, унăн çумĕ Андрей Поляков, райадминистраци ĕçĕсене йĕркелесе пыракан Татьяна Владимирова ăшшăн саламларĕç, çирĕп сывлăх, ĕçре те, спортра та малашне те пысăк çитĕнÿсем тума ырă сунчĕç.