18 января 2017 г.
Этемлĕх яланах çĕннине шырать. Информацие çĕнĕлле сарасси пирки пуç ватать. Кирек епле пичет кăларăмне кун çути кăтартассишĕн те ăста специалистсен ушкăнĕ ĕçлет. Вĕсем _ журналистсем, дизайнерсем, редакторсем, калăплавçăсем.
Раççей тата Чăваш пичечĕсен кунĕсене халалланă савăнăçлă мероприяти çулсерен республикăри пичет, радио тата телевидени журналисчĕсене, полиграфистсене, издательсене, ветерансене пĕр çĕре пуçтарать. Кăçал та çаплах пулчĕ. Январĕн 14-мĕшĕнче сăмахăн хăватлă вăйĕпе усă куракансем Чăваш патшалăх филармонийĕнче хăйсен уявне паллă турĕç. 2000 çултанпа эпир январĕн виççĕмĕш вырсарникунĕнче ?кăçал вăл январĕн 15-мĕшне лекрĕ/ Чăваш пичечĕн кунне палăртатпăр.
Уяв тĕлне филармони фойинче çĕнĕ кĕнекесемпе тата почта продукцийĕпе паллаштаракан курав йĕркеленĕ. Морис Яклашкин ертсе пыракан Чăваш патшалăх академи симфони капелли журналистсен тата хăнасен кăмăлне çĕклерĕ. Пичет ĕçченĕсене Чăваш Республикин Пуçлăхĕ Михаил Игнатьев ăшшăн саламларĕ. Вăл сăмахăн хă- ватлă вăйне çынсен ырлăхĕшĕн усă курмаллине каларĕ. Регион ертÿçи палăртнă тăрăх, массăллă информаци хатĕрĕсем социаллă пĕлтерĕшлĕ миссие пурнăçлаççĕ: вĕсем информацие сараççĕ кăна мар, вулакансене, куракансене, итлекенсене вĕрентеççĕ тата общество умĕнчи çивĕч ыйтусене палăртаççĕ, влаçпа халăх хутшăнăвне йĕркелеме пулăшаççĕ.
Уяв вăл савăнни çеç мар, çулталăка пĕтĕмлетсе пĕлтерĕшлĕ ĕçсем тунине тепĕр хут тишкерни те, çĕнĕ тĕллевсем палăртни те. 2016 çулта, сăмахран, «Канаш» хаçатăн 85 çулхи юбилейĕ пулчĕ. ЧР информаци политикин тата массăллă коммуникацисен министрĕ Александр Иванов отрасль ĕç-хĕлне пĕтĕмлетрĕ. Пичет ĕçченĕсене ЧР Патшалăх Канашĕн Председателĕ Валерий Филимонов, Пĕтĕм Раççейри «Единая Россия» политика партийĕн регионти уйрăмĕн секретарĕ Николай малов, Чăваш журналисчĕсен союзĕн председателĕн çумĕ Анатолий Данилов тата ыттисем саламларĕç. Ĕçре палăрнисене, пысăк çитĕнÿ тунисене тĕрлĕ наградăпа чысларĕç.
Ирина АНДРЕЕВА