19 августа 2016 г.
Районти чи лайăх механизаторсенчен пĕри _ Катекре пурăнакан М.П.Петров. Вăл хăй вăхăтĕнче «Советская Армия» совхозăн чи хастар комбайнерĕ шутланнă. Ун ячĕ Ачча тăрăхĕнче кашни яла ырăпа çитнĕ, ватти-вĕтти сывлăх сунса иртнĕ. Районта та хисепре тăнă.
Халĕ Михаил Петрович «Канмаш» агрофирма» тулли мар яваплă пĕрлĕхĕн тырă пуссинче «уй-хир карапне» çÿретет. Хăйĕн 70 çулхи юбилейне тинĕс евĕр хумханакан тырă пуссинче кĕтсе илчĕ. Çак паллă кунпа саламлама район администрацийĕн пуçлăхĕн çумĕ Анатолий Егоров, Ачча ял тăрăхĕн пуçлăхĕ Анатолий Аввакумов, «Канмашăн» ял хуçалăхĕпе ĕçлекен управляющийĕ Валерий Лапшин килчĕç.
Паллах, вĕсем пушă алăпа пыман. Михаил Петровича Хисеп хучĕ-пе парне парса чысларĕç, çуралнă кун ячĕпе саламласа ырлăх-сывлăх, вăрăм ĕмĕр, ĕçре ăнăçу сунчĕç. Ял тăрăхĕн «Хастар» агитбригади ун ячĕпе илемлĕ юрăсем шăрантарчĕ.
Паллах, çывăх тăванĕсем пĕрле пухăнса Михаил Петровича сумлă юбилей ячĕпе саламласа чăваш юманĕ пек çирĕп сывлăх, инçе çул пек вăрăм ĕмĕр, пархатарлă та тумхахсăр кун-çул, канлĕ те лăпкă ватлăх, кил-çуртра килĕшÿпе ăнлану сунчĕç. «Çумăрта яланах юратнă та хисеплĕ çынннăрсем пулччăр», _ терĕç вĕсем.
Светлана АНАНЬЕВА
Сăн ÿкерчĕкĕ авторăн