17 августа 2016 г.
Вырсарникун районти «Урожай» стадионта Физкультурниксен кунне халалласа пысăк спорт уявĕ иртрĕ. Сывă пурнăç йĕркине тытса пыракансем, çирĕп вăй-халлисем, спортпа туслисем пуçтарăнчĕç унта. Спорт мероприятийĕсен тĕп тĕллевĕ _ ял ĕçченĕсене спорта явăçтарса вĕсен сывлăхне çирĕплетме условисем туса парасси, вăйлă спортсменсене тупса палăртасси. Малтанах ăмăртусене хутшăнакансен парачĕ пулчĕ. уяв хăнисемпе участникĕсене район администрацийĕн ертÿçи Владимир Степанов, Патшалăх Канашĕн депутачĕсем Юрий Поповпа Кияметдин Мифтахутдинов, районти БТИ директорĕ Виталий Иванов саламларĕç.
Уявăн тĕп саманчĕ, паллах, парне парса чыс тăвасси. Физкультурниксен кунĕнче те çак йĕркене пăсмарĕç. Физкультурăпа спорта аталантарс ĕçре пысăк çитĕнÿсем тунăшăн Г.Н.Смирнов ячĕллĕ районти ача-пăча спорт шкулĕн тренерне Владимир Боголюбова тата «Космонавт» лагерь директорне Вячеслав Никитина, ДОСААФăн вырăнти уйрăмĕн председательне Викентий Владимирова, Канашри «Локомотив» спорт шкулĕн директорне Евгений Смирнова Чăваш Ен Патшалăх Канашĕн Хисеп грамотипе, Петр Архипов тренер преподавателе, Янкăлч вăтам шкулĕн физкультура учительне Валерий Филиппова патшалăх Канашĕн Тав çырăвĕпе наградăларĕç. Район администрацийĕн Хисеп хутне тивĕçнисем те чылаййăн пулчĕç.
Мини-футбол, волейбол, кире пукан спорчĕн, тĕл перекенсен, çăмăл атлетика, вĕрен туртакансен, шашкăлла вылякансен площадкисенче тупăшусем хĕрÿ иртрĕç. Кашниех çĕнтерме, мала тухма тăрăшрĕ. Пьедестал пусмисем çине тăма пултарнисем, паллах, парне те илчĕç
Владимир ИЛЬИН