01 апреля 2016 г.
Пуш уйăхĕн 20-мĕшĕнче Высоковка ялĕнче çуралса ÿснĕ, паттăрлăхĕпе Совет Союзĕн Геройĕн ятне тивĕç пулнă Анатолий Александрович Иванов çуралнăранпа 96 çул çитрĕ.
Паттăр ентеше асра тытса Чулкăмака ялĕн вулавăшĕ-нче асăну кунĕ ирттерчĕç. Унта Вăтакас Кипеч шкулĕн-че вĕренекенсем пулчĕç. Вулавăш ертÿçи Н.Павлова «Хăюллă та пултаруллă командир» электронлă презентаципе паллаштарчĕ. Кайри Ăнтавăш библиотекин заведующийĕ С.Димитриева Анатолий Александровичăн биографине каласа пачĕ, вăрçăри тата мирлĕ пурнăçри çул-йĕрĕ çинче чарăнса тăчĕ. Ачасене паттăр ентешĕ çинчен пĕлме кĕнекесенчен йĕркеленĕ «Пирĕн герой» куравпа паллашни пулăшрĕ. Ачасене вулавăша илсе килнĕ Л.Спиридонова вĕрентекен интереслĕ мероприятишĕн тав турĕ.
А.А.Иванова Тăван çĕршывăн Аслă вăрçинче паттăрлăхпа хăюлăхшăн Совет Союзĕн Геройĕн ятне панă, «Ылтăн Çăлтăр» медальпе, Ленин, Хĕрлĕ Ялав, Хĕрлĕ Çăлтăр, Александр Невский, Тăван çĕршывăн Аслă вăрçин пĕрремĕш тата иккĕмĕш степеньлĕ орденĕсемпе тата медальсемпе наградăланă.
Светлана ДИМИТРИЕВА,
Надежда ПАВЛОВА