20 февраля 2013 г.
Районта çăмăл атлетсен чупăвĕсенче лайăх кăтартусем тăвакансем хушшинче М.Алексеев та пур. Вăл – Хучел каччи, Уçырма вăтам шкулĕнче 10-мĕш класра пĕлÿ илет. Вĕренÿре "5" татат "4" паллăсемпе ĕлкĕрсе пырать. Шкул хыççăн урок тума та, спорт секцине çитме те, ашшĕ-амăшне пулăшма та вăхăт тупать. "Лайăх вĕренсе пыни спортра та çитĕнÿсем тума пулăшать", – тет Миша.
М.Алексеевăн юратнă дистанцийĕ – 100 метр. Йĕтре тĕртессипе те ÿсĕмсем пур. Миша – районăн пушарпа прикладной тата пушарпа çăлав командисен членĕ. Çак енĕпе канашсем республикăра малти вырăнсене йышăннинче унăн тÿпи те пур.
Кăçал вара Миша республикăра ирттернĕ физкультура олимпиадинче призер пулса тăчĕ. Пултарулăх тупăшăвне ăна физкультурăпа пурнăç хăрушсăрлăхĕн никĕсĕсене вĕрентекен П.И.Николаев хатĕрленĕ.
В.АЧЧА