29 января 2016 г.
Иртнĕ çул раштавăн 22-мĕшĕнче Пушарпуç ялĕнче пурăнакан вăрçă тата ĕç ветеранĕ Степан Потапович Потапова 100 çул тултарнă ятпа Раççей Президенчĕн В.В.Путинăн саламлă çырăвне савăнăçлă лару-тăрура пачĕç. Эрне кун, раштавăн 25-мĕшĕнче, Аслă Мамири тыл ĕçченĕ Агния Кондратьевна Кондратьева сумлă юбилей ячĕпе Кремльтен янă çыруллă салама илчĕ. Вăл та ĕмĕр чикки урлă утса каçрĕ.
Турри ăна çемьеллĕ пулма пÿрмен пулас. Хăйне йăпанма пĕр ача çуратса çитĕнтернĕ. Анчах та вăл вăхăтсăр çĕре кĕнĕ. Пилĕк мăнукĕ тата 5 кĕçĕн мăнукĕ _ унăн чи пысăк пуянлăхĕ. Ĕçрен хăраманни ăна пурнăçра малалла утма вăй парса тăнă, тăрăшса ĕçлеме хистенĕ. Ачаллах ĕç çумне çыпăçнă. Кун-çулĕнче савăнăçлă самантсем те, кулянмалли вăхăт та пайтах пулнă. Йывăрлăха çĕнтерме хевте çитерсе пынă, ывăлĕн, мăнукĕсен çемье ăшшине вăй çитнĕ таран упрама тăрăшнă.
Алюç кинемей, ялта çапла чĕнеççĕ ăна, "Мотор" колхозра 20 çула яхăн тĕрлĕ ĕçре вăй хунă. Хальхи вăхăтра Николай ятлă мăнукĕпе пурăнать. "Сиссе те юлмарăм 100 çула çитсе тăнине", _ тет Алюç кинемей.
Вăрăм ĕмĕрлĕ Агния Кондратьевнăна саламлама Канашран район администрацийĕн пуçлăхĕн çумĕ Валентина Алантьева, хула тата район халăхне социаллă хÿтлĕх паракан пай пуçлăхĕ Надежда Маркелова, Асхва ял тăрăхĕн пуçлăхĕ Сергей Иванов, шкул директорĕ П.Федотов, тăванĕсем, ентешĕсем килчĕç, ăна çĕр çинчи пĕтĕм ырлăха сунчĕç. Паллах, юбилей кунне, вăл вара вырăнти шкулăн пысăк залĕнче иртрĕ, никам та пушă алăпа килмен. Ял старости Ю.Егоров, ял тăрăхĕн депута-чĕсем Е.Яковлев, Е.Семенова, Р.Архипова юбиляр хул пуççи çине мамăк тутăр уртса ячĕç. Агния Кондратьева çумĕнчи пукан çине хунă парнесен купи ÿссех пычĕ: ăшă кофта, минтер, шкул ачисем ăсталанă картина, чечек çыххисем тата ытти те.
Капăр тумлă шкул ачисем Алюç кинемее саламласа илемлĕ ташăсем ташларĕç, хитре юрăсем шăрантарчĕç. Районти Культура çурчĕн ĕçченĕсем В.Борисовăпа В.Стеклов мероприятие правур ертсе пычĕç, саламлама килнисене çĕкленÿллĕ кăмăл-тăйăм кÿчĕç.
Виталий АЧЧА.
Автор сăн ÿкерчĕкĕ.