15 января 2016 г.
Юн кун район администрацийĕн пайĕсемпе службисен ертÿçисен, ял тăрăхĕсен пуçлăхĕсемпе специалисчĕсен çĕнĕ çулти пĕрремĕш анлă канашлăвĕ райадминистраци пуçлăхĕ В.Степанов ертсе пынипе иртрĕ. Канашлу ĕçне çавăн пекех районти йĕркелĕх хуралĕн органĕсен ертÿçисем, Чăваш Республикин ВДПО председателĕ С.Сергеева, 9-мĕш ОФПС гарнизонĕн пуçлăхĕ Н.Яковлев хутшăнчĕç.
Фойере пушар сÿнтермелли хатĕрсен куравне йĕркеленĕ. Канашлу ял тăрăхĕсене мунципаллă пушар хуралне лайăх йĕркеленĕшĕн хавхалантарнипе пуçланчĕ. Карăклă ял тăрăхне мотопомпа тата пушарнăй костюмĕ пачĕç. Çакăн евĕр костюма тата грамотăна Вăтакас Кипеч, Вăтапуç, Çĕнĕ Чалкасси тата Энтрияль тăрăхĕсем тивĕçрĕç.
Район администрацийĕн ятарлă программăсен секторĕн заведующийĕ В.Петров Кăшарнине уявланă чухне шыв объекчĕсенче çынсен хăрушсăрлăхне пăхăнассипе çыхăннă ыйтусем çинче тĕплĕн чарăнса тăчĕ. Кăшарнире шыва кĕме районта ятарлă 8 вырăн хатĕрленĕ: Шăхасан, Сиккасси, Уçырма, Ăвăспÿрт Кипеч ял тăрăхĕсенче. Валерий Васильевич вут-кăварпа асăрхануллă пулмаллине те аса илтерчĕ.
Обществăлла инфратытăм аталанăвĕн пайĕн пуçлăхĕ В.Алантьева кĕркуннехи-хĕллехи тапхăрта районти çулсене юсавлă тытса тăрассипе çыхăннă мерăсемпе, ку енĕпе лару-тăру мĕнле аталанса пынипе паллаштарчĕ. Вăл каланă тăрăх, çулталăк пуçланнăранпа хăш-пĕр ялсенче урамсемпе çулсене юр шăлса лартни, вĕсене вăхăтра тасатманни пирки çăхавсем килсе тăраççĕ.
Кун йĕркин виççĕмĕш ыйтăвĕ тăлăх тата ашшĕ-амăшĕн хÿтлĕхĕсĕр тăрса юлнă ачасене хăтлă хваттерсемпе е пÿлĕмсемпе тивĕçтересси çинчен пулчĕ. Кун пирки опекăпа попечительство секторĕн заведующийĕ В.Сорокин каласа пачĕ.
Канаш хулипе районĕнче пурăнакансене социаллă хÿтлĕх паракан пай пуçлăхĕн çумĕ Э.Яковлева граждансен уйрăм категорийĕсене коммуналлă пулăшусемшĕн тÿлеттермелли йĕркене кĕртнĕ çĕнĕлĕхсем çинче чарăнса тăчĕ.
Çуртсен фасачĕсене тата культурăпа социаллă сфера учрежденийĕсен, суту-илÿ объекчĕсен тата ял тăрăхĕсен администрацийĕсен территорийĕсене Çĕнĕ çул ячĕпе илемлетес енĕпе ирттернĕ конкурсăн пĕтĕмлетĕвне пĕлтерчĕç. Район архитекторĕ С.Николаев мала тухнисене дипломсем тата укçан преми парса хавхалантарчĕ.
Хулапа район халăхне ĕçе вырнаçтаракан Центр директорĕ Б.Семенов Канашри транспортпа энергетика техникумĕнче тракториста вĕрентекен ушкăн уçăласси çинчен пĕлтерчĕ. Çул тăкакне саплаштараççĕ. Борис Алексеевич ял тăрăхĕсен пуçлăхĕсене çынсене ял хуçалăх ĕçĕсене, территорисене тирпей-илем, ешĕл тум кĕртес ĕçсене яма Центрпа килĕшÿсем тума ыйтрĕ.
Район администрацийĕн пуçлăхĕ В.Степанов январĕн 12-мĕшĕнче муниципаллă хуласемпе районсен пуçлăхĕсен канашлăвĕ мĕнле иртни çинчен каласа пачĕ.
Антонина ТЯМИНА.