09 декабря 2015 г.
Пĕршенер клубĕ юлашки икĕ уйăхра хăйĕн ĕçне палăрмаллах лайăхлатрĕ. "Чăнах та, телевизорпа авкаланакан артистсене курса йăлăхрăмăр, ялти пултаруллă çамрăксен юрри-ташшине курас-илтес килет", _ тет почтальонта нумай çул ĕçлесе пенсие тухнă Мария Краснова. Нумаях пулмасть ялти çамрăксем Галина Никифорова клуб ертÿçи хавхалантарса пынипе "Кĕрхи бал" ирттернĕ. Лăк тулли пухăннă ял халăхĕ клуба. Ларма-тăма вырăн пулман. Вăрăмпуçсем те хăпарнă Пĕршенере концерт курма.
Музыка янăраса кайсан артистсем юрлама, ташлама пуçланă. "Пăхăр-ха, пăхăр, кам ачи ку артист пекех авкаланаканни;" _ интересленнĕ куракансем. "Ара, Скворцов Ванюш хĕрĕ Настя вĕт-ха, çиччĕмĕш класра вĕренекенни. Артист пулмах çуралнă пулĕ, юрлама-ташлама питĕ ăста". Чылайччен саланман çав каç халăх клубран. Концерт пурне те килĕшнĕ. "Малашне те пире юрă-ташăпа савăнтарăр-ха", _ ыйтнă ял халăхĕ пултаруллă çамрăксенчен.
Лешсем кутăнлашса тăман, çийĕнчех тепĕр концерт лартса та панă. Каллех халăх лăк туллин пухăннă ялти клуба. Ку хутĕнче, ноябрĕн 28-мĕшĕнче, пултаруллă артистсем хăйсен юрри-ташшине "Амăшĕн кунне" халалланă. Тăвăллăн алă çупса хак панă кашни номере залра ларакан халăх.
Камсем-ха вĕсем, ялти халăха савăнтаракансем; Колхозра ĕне сăвакан Роза Крючковăпа фельдшерпа акушер пунктĕнче ĕçлекен Алена Николаева сцена çинче шÿт калама питĕ ăста. Куççуль тухиччен ахăраççĕ çынсем янаххи çине арçын сухалĕ çакса янă медсестрапа карчăк тумĕ тăхăннă доярка сцена çине тухсан.
Курасчĕ сирĕн педколледжра вĕренекен Виолетта сцена çинче ташланине! Сасси тата мĕнле уçă! Кай, пулаççĕ те çав пултаруллă çынсем. Паян тесен паян кăлар вĕсене театр сцени çине. Унта та маххă памĕç вĕсем.
Наташа Матвеевăпа Наташа Федорова Канашра пурăнаççĕ пулин те, тăван ялтан уйрăлма пĕлмеççĕ. Вĕсем Хĕвел тухăç ташшисене ташланă чухне залри халăх, чăтаймасăр, вырăнтан сиксе тăрса авкаланма-хуçкаланма пикенет.
Пĕртăван Дианăпа Снежанна Яковлевасем, 9-мĕш тата 7-мĕш класра вĕренекенсем, иккĕшĕ дуэтпа чăваш юррисене юрлама тытăнсан хĕрарăмсем куç-çульне тутăрпа шăла-шăла илеççĕ. Вĕсем тата ташша ярсан!
Саккăрмĕш класра вĕренекен Марина Захаровăпа çиччĕмĕш класра вĕренекен Настя Алексеева ташлама ăста, юрри те вĕсен хитре тухать. Улттăмĕш класс хĕрачи Ангелина Григорьева ташлама та, юрлама та ăста.
Виççĕмĕш класра вĕренекен Таня Николаевăна та асăнмасăр хăварас килмест. Вăл сăвă каланине, юрланине залри халăх тăвăллăн алă çупса хак парать.
Ялти артистсем çитес вăхăтра концертпа малтан Çĕнĕ Шелттеме, кайран Вăтапуçне çитсе килесшĕн. Унтан Вăрăмпуç халăхне савăнтарма та черет çитет.
Ксения ЕМЕЛЬЯНОВА.