09 декабря 2015 г.
Кĕçнерни кун, раштавăн 3-мĕшĕнче, Пĕтĕм тĕнчери инвалидсен кунне паллă турăмăр. Уяв дати мар, общественноçа вĕсен тĕлĕшпе тимлĕ пулма ыйтни тата инкек куçа курăнса килменни, инвалид пурнăçра лару-тăрăва лекнĕ çын пулнă пирки хамăра тепĕр хут аса илтерни. Инвалидлăх _ социаллă пулăм, унран тĕнчери пĕр общество та хăпма пултараймасть. Пур çĕршывра та тенĕ пекех пурăнакансенчен 10 процентне яхăн сусăр çынсем. Çак кăтарту вара ÿссех пырать. Хальхи вăхăтра официаллă статистика даннăйĕсем тăрăх, Раççейре инвалидсен йышĕ 13 миллиона яхăн. Чăваш Енре 86,3 пин, районта 2508 çын инвалид статусне илнĕ.
Шăхасанти физкультурăпа спорт комплексĕнче Инвалидсен кунĕ ячĕпе пысăках мар мероприяти ирттерчĕç. Районти инвалидсен организацийĕ, хулари тата районти халăха социаллă хÿтлĕх паракан пайра ĕçлекенсем ÿт-пÿ енчен хевтесĕр çынсен кăмăлне çĕклес тĕллевпе интереслĕ программа хатĕрленĕ.
Район администрацийĕн пуçлăхĕн çумĕ А.Поляков, социаллă хÿтлĕх пайĕн пуçлăхĕ Н.Маркелова, унăн çумĕ Э.Яковлева, район депутачĕсен Пухăвĕн депутачĕ Е.Смирнов, Канашри телестудин ертÿçи В.Тимофеев, Канашри комплекслă социаллă пулăшупа тивĕçтерсе тăракан бюджет учрежденийĕн директорĕ М.Никитина хăйсен ырă сунăмлă сăмахĕнче хевтесĕр çын обществăра хăйне ют ан туйтăр, ыттисемпе хутшăнма чăрмавсем ан пулччăр тесе хальхи вăхăтра çĕршывра та, республикăра та, хулапа районта та нумай ĕç тунине палăртрĕç. Инвалидсен пурнăç условийĕсене лайăхлатас тĕллевпе пурнăçланă ĕçсен шучĕ те пĕчĕк мар. Вĕсем чунĕпе вăйлă та çирĕп, пурнăçа мĕнле юратмаллине, уншăн кĕрешмеллине хăйсен тĕслĕхĕпе кăтартса параççĕ.
Пĕтĕм Раççейри инвалидсен обществин районти организацийĕн председателĕ А.Семенов тата унăн çумĕ А.Ильин çакăн евĕрлĕ мероприятисем ирттерме укçа-тенкĕ енчен пулăшнăшăн район администрацийĕн пуçлăхне В.Степанова, Г.Н.Смирнов ячĕллĕ фондăн директорне Е. Смирнова, Канашри телевидени студийĕн ертÿçине В.Тимофеева, Киров ячĕллĕ ял хуçалăх производство кооператив ертÿ-çине Н.Андреева, "Проремстрой" тулли мар яваплă пĕрлĕх директорне М.Зефирова тата ыттисене тав çырăвĕсем парса чысларĕç. Шаккăл ял тăрăхĕнчи ĕç ветеранĕсен канашĕн председателĕ Геннадий Белов сусăрсен ячĕпе хăйсене хисеплесе çакăн пек мероприяти йĕркеленĕшĕн чун-чĕререн тав турĕ, ÿлĕм те ырă ĕçсем тума ырлăх-сывлăх сунчĕ.
Инвалидсене Чăваш Республикин культурăн тава тивĕçлĕ ĕçченĕ В.Стеклов ертсе пыракан ветерансен хорĕ савăк юрăсемпе иксĕлми савăнăç кÿчĕ. Çакăн хыççăн спорт вăййисем пуçланчĕç. Шашка, шахмат хăмисем çинче пуçа ватмалли тупăшусем пычĕç. Шашка вăй-йине кăмăллакансен хушшинче Ямашри Юрий Константиновпа Малти Тукайри Григорий Владимиров пĕр пек очко пухса пĕрремĕш вырăна пайларĕç. Хĕрарăмсенчен Сиккассинчи Александра Ендеровăран ăстарах выляканни тупăнмарĕ. Шахматла выляс тĕлĕшпе Кăшнаруйĕнчи Юрий Никандрова çитекенни пулмарĕ. Вăтапуç хĕрĕ Людмила Колпакова кашни çулах инвалидсен пĕр ăмăртăвĕнчен те юлмасть. Хальхинче те хастар пулчĕ _ стена çумне çакнă мишень çине дротиксем персе чи нумай очко пухаканни пулчĕ. Ар-çынсенчен Пайкилтри Николай Семенов çĕнтерчĕ. Сĕтелçи теннисла выляса пĕрремĕш вырăна Шăхасанти Татьяна Муравьевăпа Вăтапуçĕнчи Юрий Шилов йышăнчĕç. Çĕнтерÿçĕсемпе призерсене дипломсемпе наградăларĕç, парнесем парса хавхалантарчĕç.
Тĕлпулу вĕçĕнче сĕтел хушшине ларса пылак чей ĕçрĕç, тутлă кукăль çирĕç, ăшă калаçу пуçарчĕç.
Виталий АЧЧА.