09 декабря 2015 г.
Ĕмĕре мăшăрпа ĕмĕрлени _ пысăк телей, унсăр пуçне пысăк ĕç те. Пирĕн районта çирĕп те туслă, ачасене тĕрĕс воспитани паракан çемье нумай пулни савăнтарать.
Çур ĕмĕр пĕрле пурăнма çăмăлах та мар. Юрăри пек аллă çул пĕрле пурăнма пĕр юрра юрлама пĕлмеллех-тĕр. Шăхасан ялĕнче пурăнакан Николай Федоровичпа Римма Федоровна Федоровсем çур ĕмĕре яхăн пĕр-пĕрне хисеплесе те юратса пурăнаççĕ. Вĕсене ялта пурте пĕлеççĕ, сума сăваççĕ.
Николай Федоровича районта кашни виççĕмĕш пулмасан та вуннăмĕш çын пĕлет пулĕ. Вăл Хусанти патшалăх медицина институчĕн сиплев факультетне вĕренсе пĕтернĕ хыççăн 44 çул район больницинче терапевт врач пулса ĕçленĕ, вĕсенчен 34 çулне _ терапи уйрăмĕн заведующийĕ пулса. Сиплевçĕн ĕçне патшалăх наградисемпе хакланă. Николай Федоровича "Ĕçре палăрнăшăн" медальпе ?1986/, "СССР Сывлăх сыхлавĕн отличникĕ" паллăпа ?1991/, "Чăваш Республикин тава тивĕçлĕ врачĕ" хисеплĕ ятпа ?2011/ чысланă.
Н. Федоров Вăтакас Кипеч ялĕнче çуралса ÿснĕ. Канашри медицина училищине вĕренсе пĕтерсен çамрăк фельдшера Çĕнĕ Шуртанри фельдшерпа акушер пунктне ĕçлеме янă пулнă. Яштак пÿ-силлĕ каччă хăйĕн Турă çырнине те çак ялтах тупнă.
Сăпайлă та илемлĕ Римма ятлă хĕр ялти клуб заведующийĕнче тăрăшнă. Çамрăксем каçсерен клуба тухнă, кунтах паллашнă та. 1967 çулхи декабрĕн 14-мĕшĕнче вĕсем мăшăрланнă.
Римма Федоровна упăшки пекех нумай çул район больницинче ĕçленĕ. Хирурги уйрăмĕн операци блокĕнче ăна халĕ те ырăпа кăна аса илеççĕ. Пархатарлă ĕçĕшĕн панă награда нумай унăн.
Чÿк уйăхĕн вĕçĕнче Шăхасанти Культура çуртĕнче пĕр мăшăр Николай Федоровичпа Римма Федоровна Федоровсене район администрацийĕн ЗАГС пайĕн пуçлăхĕ Ирина Сергеева, ял тăрăхĕн специалисчĕ Любовь Осипова, "Парчар" фольклор ушкăнĕ саламларĕç. Ирина Юрьевна район администрацийĕн пуçлăхĕн Владимир Степановăн саламлă çырăвне вуласа пачĕ.
Мăшăр районти Хисеплĕ юбилярсен кĕнекинче алă пусрĕ.
Ирина МОРОЗОВА,
райадминистрацин ЗАГС пайĕн специалисчĕ.