25 ноября 2015 г.
Çеçпĕл ял тăрăхĕнче ватăсене çавра çулсемпе саламласси тахçанах ырă йăлана кĕнĕ. Ноябрĕн 16-мĕшĕнче акă ялти Культура çуртĕнче Нина Афанасьевна Андреевăна 70 çулхи çавра çулĕпе саламларĕç. Ял тăрăхĕн администраци ертÿçи Светлана Иванова ăна ăшă сăмах каласа телей, нумай çул пурăнма çирĕп сывлăх сунчĕ, асăнмалăх пĕчĕк парне пачĕ. Ялти пултарулăх артисчĕсем Нина Афанасьевна ячĕпе темиçе юрă юрласа пачĕç, ăна чăваш юманĕ пек çирĕп сывлăх сунчĕç.
Нина Андреева нумай çул Владивосток хулинче ĕçлесе пурăннă. Тăван яла таврăнсан 20 çул Канашри чукун çул организацийĕсенчен пĕринче тăрăшнă. Нина Афанасьевна ял тăрăхĕнчи ветерансен канашĕн ертÿçи, хăйĕн тивĕçĕсене май килнĕ таран туллин пурнăçласа пыма тăрăшать. Тăтăшах ватăсемпе тĕл пулса вĕсен пурнăç условийĕсемпе интересленет.
Василий ЛАПИН.
Автор сăн ÿкерчĕкĕ.