25 ноября 2015 г.
Федераллă налук службин Чăваш Республикипе ĕçлекен 4-мĕш номерлĕ инспекцийĕ Канаш хулинче, Канашпа Тăвай районĕ-сенчи налук тÿлекенсен ыйтăвĕсене тивĕçтерет. Вăл патшалăх хыснине налук укçи вăхăтра кĕрсе тăрассине йĕркелесе тăрать. Асăннă укçа-тенкĕ бюджетăн тупăш пайне тултармалли тĕп çăл куç шутланать, ăна социаллă пурнăçпа экономикăн чи пĕлтерĕшлĕ тĕллевĕсем валли _ социаллă программăсене укçа-тенкĕпе тивĕç-терме, экономикăпа общество инфратытăмне аталантарма, хăрушсăрлăхпа право йĕркине тивĕçлĕ шайра тытса тăма _ приоритетлă йĕркепе уйăраççĕ.
Чÿк уйăхĕн 19-мĕшĕнче инспекци çуртĕнче налук органĕсем 25 çул тултарнине тата налук службин ĕçченĕсен кунне паллă турĕç. Канаш налукçисемпе пĕрле Чăваш Республикинчи налук службин управленийĕн ертÿçин çумĕ Ольга Никина, Тăвай район администрацийĕн пуçлăхĕ Владимир Ванерке, Канаш район администрацийĕн пуçлăхĕн çумĕ Анатолий Егоров, хула администрацийĕн финанс пайĕн пуçлăхĕ Наталья Баранова савăнчĕç. Хисеплĕ хăнасене ырă йăлана пăхăнса çăкăр-тăварпа кĕтсе илчĕç. Пĕрремĕш хутра налук тÿлекенсене йышăнмалли зала тĕпрен юсаса çĕнетнĕ, хĕрлĕ хăйăва касса унăн алăкне яриех уçрĕç. Ольга Никина пĕлтернĕ тăрăх, юсав ĕçĕсене пурнăçлама 1,5 млн тенкĕ уйăрнă. Кунта хăтлă та илемлĕ. Залри лару-тăру клиентсене те, налукçăсене те килĕшетех.
Уяв программине инспекцин пуçлăхĕ Лариса Доронина уçрĕ. Вăл ĕç кăтартăвĕсемпе паллаштарчĕ, хастар ĕçпе ырă ят çĕнсе илнисен ячĕсене асăнчĕ. Ольга Никина, Анатолий Егоров, Владимир Ванерке тата Наталья Баранова налук инспекцийĕн ĕçченĕсене, ветеранĕсене уяв ячĕпе саламласа çирĕп сывлăх, ĕçре çитĕнÿсем, палăртнă мĕнпур тĕллеве пурнăçлама тата çемье ырлăхне сунчĕç.
Ĕçре малта пыракансене медаль, грамота, Тав çырăвĕ, парне парса хавхалантарчĕç. Район администрацийĕн Хисеп грамотине Наталья Васильева эксперт специалистпа Екатерина Пичуркина аслă инспектор тивĕç пулчĕç.
А.ТЯМИНА.