20 ноября 2015 г.
Чÿк уйăхĕн 11-мĕш кунĕ Ухман вăтам пĕлÿ паракан шкулĕн кун-çул кĕнекине яланлăхах çырăнса юлчĕ. Çавăн пекех район историйĕнче те паллă йĕр хăварчĕ.
Пирĕн республикăра çамрăк ăрăвăн чун хавалĕнче патриотизм, чыслăх, харпăр тивĕçлĕх туйăмне çуратас, ăна çирĕплетес тĕллевпе пуçарнă юхăм вăй илсе пырать. Çакă хамăр районта та сисĕмлĕ _ кадетсен хисепĕ ÿссех пырать. Канаш енре кадетсен пĕрремĕш класĕ 2007 çулта Раççей Геройĕ Н.Ф.Гаврилов ячĕллĕ Янкăлч вăтам пĕлÿ паракан шкулĕнче йĕркеленнĕ. Çак класăн воспитанникĕсем çамрăк армеецсен "Орленок" тата "Зарница" вăййисене, пултарулăх ăмăртăвĕсене хутшăнса хăйсем пирки республикăра та, районта та ырă ят хăвараççĕ, вĕсен хушшинче çар училищисен курсанчĕсем пулса тăнисем те пур.
Ухман шкулĕнче 130 ача ăс пухать. Вĕсенчен 32-шĕ, 5-7-мĕш классенче вĕренекенскерсем, çав кун тĕксĕм кăвак костюмпа, шурă кĕпепе, хура галстукпа, хура беретпа килчĕç, хулпуççи урлă капăр тĕсмесем çакнă, çар çыннисем ăна аксельбант, теççĕ. Паянхи кун вĕсемшĕн ĕмĕрлĕхех асра юлĕ. Кадет ятне тупа туса çирĕплетĕç. Вĕсен ертÿçи, отставкăри майор, районти полици службин ветеранĕ И.Капустин кашнин çи-пуçне тĕрĕслерĕ, усăллă канашсем пачĕ, мĕнле çар хусканăвĕсем тумаллине аса илтерчĕ.
Пурте хатĕр пулсан Иван Романович шкул директорне С.Калиновскаяна кадетсен отрячĕ савăнăçлă меропритине хатĕр пулнине пĕлтерчĕ. Вăл команда панипе çап-çамрăк "салтаксем" спорт залĕн варрине строя тăчĕç. Раççей Федерацийĕн, Чăваш Республикин тата Канаш районĕн Мухтав юррисем янăрарĕç. Хăватлă та мăнаçлă янăрава ачасен сасси те хушăнчĕ. Гимнсем хыççăн кадетсем черетпе строй умне тухса тупа сăмахĕсене каларĕç. Залра савăнăçлă, çав хушăрах хумхануллă лару-тăру хуçаланчĕ.
Кадет пулса тăнă ятпа ачасене район администрацийĕн пуçлăхĕн çумĕ А.Егоров, çар комиссариачĕн вырăнти уйрăмĕн пуçлăхĕ Ю.Барышов подполковник, Ухман ял тăрăхĕн пуçлăхĕ А.Петров, вĕренÿ управленийĕн пуçлăхĕ Ю.Алексеев, ДОСААФăн Канашри автошкулĕн директорĕ В.Анисимов, Çурçĕр Кавказ территорийĕнчи çар конфликчĕсене хутшăннисен союзĕн Канашри уйрăмĕн председателĕ М.Ильин, воин-интернационалистсем, шкул директорĕ С.Калиновская, ачасен ашшĕ-амăшĕ, вĕрентекенĕсем саламларĕç. Канаш хулипе районĕн чиркĕвĕсене пăхса тăракан Серафим иерей хĕрес хывса пил пачĕ.
_ Эсир паян тупа турăр. Вăл сире Тăван çĕршыва тата хытăрах юратма, ваттисене хисеплеме, кĕçĕннисене пулăшма, обществошăн усăллă çын пулса ÿсме хистĕ. Эсир ентешĕрсемпе тантăшăрсемшĕн яланах, кирек ăçта та паха тĕслĕх пулма тивĕç. Ырă ĕçре ăнăçу сунатăп, утас çулăр такăрлансах пытăр, _ терĕ Анатолий Николаевич.
ДОСААФăн автошкулĕ кадетсен класне походра усă курмалли хуран парнелерĕ. Парнесем татах та пулчĕç. Савăнăçлă линейка пуçламăшĕ пекех гимнсемпе вĕçленчĕ. Спорт залĕнчи хаваслă шав классене куçрĕ.
Виталий АЧЧА.
Автор сăн ÿкерчĕкĕ.