20 ноября 2015 г.
.jpg "Çар тивĕçне Кремльте пурнăçлĕç")
Призывăн кĕрхи тапхăрĕнче Раççей Федерацийĕн Хĕç-пăшаллă вăйĕсен чаçĕсене Чăваш Енрен 1220 çынна ямалла. 336-ăн çар тумне тăхăннă та ĕнтĕ. Ытлари кун республикăри çар комиссариачĕн Канашри пухăнмалли пункчĕн клубĕнче çамрăксене салтака ăсатма савăнăçлă мероприяти ирттерчĕç. Чăваш тăрăхĕн чи лайăх каччисем, вĕсем вара 10-ăн, çар тивĕçне Раççей Федерацийĕн федераллă хурал службин Мускав Кремлĕн Комендатурин Президент полкĕнче пурнăçлĕç.
Савăнăçлă мешехене Чăваш Республикин Пуçлăхĕн Администрацийĕн ертÿçи Юрий Васильев, вĕренÿ тата çамрăксен политикин министрĕ Владимир Иванов, Федерацин Чăваш Республикипе ĕçлекен тĕп инспекторĕ Геннадий Федоров, республикăн çар комиссарĕ Александр Мокрушин, район тата хула администрацийĕсен пуçлăхĕсем Владимир Степановпа Владислав Софронов, салтак ячĕ тухнисен ашшĕ-амăшĕ, кадетсем хутшăнчĕç.
Раççей Федерацийĕн тата Чăваш Республикин Патшалăх гимнĕсем мăнаçлăн янăранă хыççăн зала пĕлтĕр салтак пулса тăнă, службăна Кремльте ирттернĕ 15 çар служащийĕ стройпа утса кĕчĕç. Вĕсен хушшинче хулари 4-мĕш номерлĕ вăтам шкулта ăс пухнă Евгений Немцев та пур. Çар ретне тăриччен вăл Хусанти Плеханов ячĕллĕ экономика университетĕнче икĕ курс пĕтернĕ. Килес çул вĕренĕве малалла тăсасшăн. Геннадий Федоров тĕп инспектор Чăваш Республикин Пуçлăхĕ Михаил Игнатьев ячĕпе çар тивĕçне чыслăн пурнăçланăшăн тав турĕ, кашнине Чăваш Ен символикиллĕ алла çыхмалли сехет парнелерĕ.
_ Аçăр-аннĕр, сире пĕлÿ панă учительсем, преподавательсем, çар комиссариачĕн представителĕсем сирĕншĕн халĕ еплерех хĕпĕртеççĕ, сирĕнпе мухтанаççĕ. Чунăрта амаланакан мăнаçлăх туйăмĕ вăл _ салтак пулас текен кашни çамрăкăн ĕмĕчĕ, _ терĕ çар тумне тин кăна тăхăннă каччăсене республика Пуçлăхĕн Администрацийĕн ертÿçи Юрий Васильев.
Юрий Егорович сцена çине чĕнсе илнĕ 10 призывника Чăваш Республикин Пуçлăхĕн ырă çул сунăмĕллĕ çырăвне пачĕ. Тăван çĕршывăн Аслă вăрçинче пуçĕсене хунисене асăнса пĕр минут шăп тăчĕç, Канашри патшалăх службипе управлени лицейĕн кадечĕсен ушкăнĕ паттăр ентешсене асăнса лартнă монумент умне чечексем кайса хучĕ. Залра ларакан вăрçă ветеранĕсене Вячеслав Калинкина, Феодора Стекловăна тата Арсентий Питеркина чечек çыххисем пачĕç.
Республикăн çар комиссарĕ Александр Мокрушин, вăрçă ветеранĕ Вячеслав Калинкин, Волгоградра службăра тăракан Игорь Терентьев капитан призывниксене çар вĕренĕвĕнче ăнăçу, Чăваш Ен ятне ялан çÿлте тытма сунчĕç. Канаш тата Тăвай епископĕ Стефан Турă яланах сирĕнпе пĕрле тесе пил пачĕ. Призывниксен ячĕпе Михаил Ермолаев сăмах каларĕ.
_ Президент полкĕнче службăра тăма шаннăшăн пурне те тав тăватпăр. Çак шанăç _ пирĕншĕн пысăк чыс, яваплăх. Ăна тÿрре кăларма сăмах паратпăр, _ терĕ вăл.
Призывниксене патшалăх службипе управлени кадечĕсем юрă-сăвăпа, ташăпа саламларĕç. 1-мĕш номерлĕ вăтам шкулта вĕренекен Олеся Захарова анне çинчен хывнă илемлĕ чăваш юррипе залра ларакансене тыткăнларĕ.
Кремльте службăра тăма тивĕç пулнă 10 çамрăкран иккĕшĕ _ Канаш Ен каччисем. Никита Сергеев _ Карăклăран, Евгений Матвеев _ Ухмантан. Иккĕшĕ те кăçал вăтам шкултан лайăх паллăсемпе вĕренсе тухнă, спортпа туслă. Никита ирĕклĕ мелпе кĕрешекенсен секцине çÿренĕ, тĕрлĕ шайри ăмăртусенче малти вырăнсене йышăннă. Женя мĕн пĕчĕкрен футбол вăййине юратать. Иккĕшĕн те ашшĕсем йĕркелĕх хуралĕнче службăра тăрса пенсине тивĕçнĕ. Никитăн амăшĕ, Лариса Андреевна, хулари кафере ĕçлет, йăмăкĕ, Лера, пĕчĕк-ха, виççе кăна пуснă. Ÿсерехпе юлташĕсен умĕнче пиччĕшĕпе мăнаçланĕ-ха. Женьăн амăшĕ, Антонина Александровна _ хула больницин тĕп бухгалтерĕ, ăна кăçал ял-йыш иккĕмĕш хут Ухман ял тăрăхĕн депутатне суйларĕ. Район администрацийĕн пуçлăхĕ Владимир Степанов маттур каччăсене асăнмалăх парне пачĕ, çĕршывăн чăн-чăн хÿтĕлевçи пулма, тăван киле тĕрĕс-тĕкел çаврăнса килме сунчĕ.
Виталий АЧЧА.
Автор сăн ÿкерчĕкĕ