27 февраля 2015 г.
ВОЛЕЙБОЛ. Шăхасанти "Импульс" физкультурăпа спорт комплексĕнче патшалăх влаçĕн тата вырăнти хăй тытăмлăх органĕсенче ĕçлекенсенчен йĕркеленĕ волейбол командисен хушшинче Туслăх кубокне çĕнсе илессишĕн тăххăрмĕш турнир иртрĕ. Ăмăртăва 5 команда хутшăнчĕ: Чăваш Республикин Пуçлăхĕн администрацийĕ, Шупашкарти "Лира", Сĕнтĕрвăрри хулинчи технологи техникумĕ, Вăрнар тата Канаш районĕсен администрацийĕсем.
Çивĕч тупăшура пĕр-ремĕш вырăна вăрнарсем çĕнсе илчĕç. Пирĕн ентешсем пьедесталăн иккĕмĕш картлашки çине улăхрĕç. Виççĕмĕш кăтарту - шĕкĕр хулари "Лирăн".
ЙĔЛТĔР. Ульяновскран, Удмурт, Тутар Республикисенчен, Чăваш Енĕн тĕрлĕ хулипе районĕнчен килнĕ 200 яхăн спортсмен "Хучел йĕлтĕр йĕрĕ - 2015" уçă ăмăртăва хутшăнчĕ. Командăсем кубоксен 12 комплекчĕшĕн, йĕлтĕрçĕсем медальсемпе дипломсемшĕн кĕрешрĕç. Çавăн пекех мала тухнисене преми парса хавхалантарчĕç. Призерсен хушшинче канашсем те пур: Виктор Суракин, Яна Казакова, Анастасия Андреева, Иосиф Григорьев тата ыттисем.
Е.Анисимов ячĕллĕ Шелттем пĕтĕмĕшле пĕлÿ паракан тĕп шкул стадионĕнче Аслă Çĕнтерÿ 70 çул тултарнине халалласа "Мухтав йĕлтĕр йĕрĕ - 2015" Кубока çĕнсе илессишĕн ăмăрту йĕркелерĕç. Ентешĕсем патне Чăваш Республикин тава тивĕçлĕ тренерĕ, йĕлтĕрпе чупассин Пĕтĕм Раççейри категорин судйи Михаил Игнатьев та килчĕ.
Çамрăк спортсменсене район администрацийĕн пуçлăхĕн çумĕ Валентина Алантьева, ял тăрăхĕн пуçлăхĕ Владимир Николаев, шкул директорĕ Сергей Ерицов, ăмăртусен яланхи партнерĕ Николай Николаев саламларĕç. Йĕл-тĕрçĕсемпе хăнасене техĕмлĕ чейпе тата çăварни икерчипе сăйларĕç.
Мала тухнисене дипломсем, парнесем парса хавхалантарчĕç. Ăмăрту уяв салючĕпе вĕçленчĕ.
ХОККЕЙ. Манмаççĕ Сурăм тăрăхĕнче хăйсен мухтавлă ентешне, стратеги пĕлтерĕшлĕ ракета çарĕсен генерал-майорне Николай Михайлова. Ун ячĕпе хоккей турнирĕ ирттерчĕç. Тĕп парнешĕн пăр çинче 3 команда кĕрешрĕ. Вĕсенче - шкул ачисемпе студентсем, çамрăксем тата ветерансем. Турнир пуçланнă ятпа саламлама район администрацийĕн пуçлăхĕ Владислав Софронов та килчĕ.
Спонсорсем пулăшнипе çĕнтерÿçĕсемпе призерсем кубоклă, медальлĕ, вымпеллă пулчĕç.
БИАТЛОН. Чакаç ялĕнче Тăван çĕршыв хÿтĕлев-çин кунĕ ячĕпе биатлон-эстафета ирттерчĕç. Программăра - çемье эстафети, арçынсемпе хĕрарăмсем уйрăммăн чупасси, 9-14 çулти ачасем.
Çемье командисен хушшинче Григорьевсем çĕнтерчĕç, иккĕмĕш вырăнта - Степановсем, виççĕмĕшĕнче - Петровсем. Уйрăм спортсменсен хушшинче мала тухнисем: Анатолий Ивановпа Ирина Петрова, Святогор Петровпа Светлана Васильева, Иосиф Григорьевпа Наталья Степанова. Ăмăртăва хутшăннисенчен чи çамрăкки - Святогор Петров, вăл тăххăрта.
А.ВИТАЛЬЕВ хатĕрленĕ.