18 февраля 2015 г.
.jpg "Пирĕн вăхăтри паттăр")
Пирĕн хушăра пиншер çын пурăнать. Вăл йышра паттăрсем те тĕл пулаççĕ. Паттăр тесессĕнех куç умне вăрçăра паттăрлăх кăтартнă çын сăнарĕ тухса тăрать. Анчах та вăрçă тахçанах чарăннă-çке. Çапăçу хирĕнчи паттăрлăх пысăк хисепре пулин те кулленхи пурнăçра хăйсен сывлăхне хĕрхенмесĕр çын пурнăçне çăлма пултаракансене те çав йышах кĕртес килет.
Вулакансене хамăр районта пулса иртнĕ пĕр тĕлĕнмелле пулăмпа паллаштарас килет. Нарăс уйăхĕн 7-мĕшĕнче шăп çурçĕр тĕлĕнче Атнаш ялĕнче çурт çунма пуçланă, çав самантра унта çемье пулнă. Вăл синкерлĕ кун Игорь Валентинович Егоров, 15-мĕш ПЧăн отделени командирĕ, дежурство хыççăн каннă.
Унăн телефонĕ çине диспетчер шăнкăравланă та Молодежная урамра çурт çунни çинчен пĕлтернĕ. Игорь Валентинович пĕр тăхтаса тăмасăр инкек пулнă вырăна вĕçтернĕ. Кил-çуртра çынсем пуррине тата унти планировкăна пĕлсе сывламалли аппаратсăр вăл упаленсе çунакан пÿрте кĕнĕ. Часах диван çинче выртакан кил хуçине асăрханă, ăна, тăнсăрскерне, урама сĕтĕрсе тухнă. Пуçне курткăпа витсе çулăм ăшне тепре вирхĕнсе кĕнĕ. Çывăрмалли пÿлĕм тĕлне çитсен урайĕнче выртакан кил хуçи ывăлне хыпашласа тупнă, вăл та тăнсăр пулнă. Ăна та паттăр арçын уçă сывлăша сĕтĕрсе тухнă. Хăйĕн пурнăçне хăрушлăх умне кăларса тăратнăскер тивĕçе пурнăçлани çинчен çеç пĕлтерет.
15-мĕш ПЧăн отделени командирĕ И.Егоров шалти службăн прапорщикĕ. Вăл 1970 çулхи çу уйăхĕн 30-мĕшĕнче çуралнă. Пушар хуралĕнче 2002 çултанпа ĕçлет. 2005 çултанпа отделение ертсе пырать.
Вут-кăвара хирĕç кĕрешнĕ чухне палăрнăшăн тата инкекре çынсене çăлнăшăн Игорь Валентиновича Раççей МЧСĕ ведомство наградисемпе пĕрре кăна мар чысланă. Пирĕн хамăрăн паттăрсене пĕлмелле, вĕсем пек пулма тăрăшмалла.
О.АБРАМОВА,
15-мĕш ПЧ инженерĕ.