18 февраля 2015 г.
Тăвай районĕнчи Енĕш Нăрваш хĕрĕ Е.Гурьева шкулта вĕреннĕ чухнех чăваш наци кĕрешĕвĕпе интересленнĕ. Унра пиçиххипе кĕрешес ăсталăх пуррине В.Владимиров физрук асăрханă. Унăн сăмахĕсене ăса хывса Женя кавир çинче тытăçакансен секцине çÿреме тытăннă. Тăхăр класс пĕтерсен Владимир Витальевич сĕннипе Канашри педагогика колледжĕн физкультура уйрăмне вĕренме кĕнĕ. Виççĕмĕш çул вĕренет ĕнтĕ вăл унта. Кунта Женя хăйне ĕçчен, яваплă, пуçаруллă студент пулнине кăтартса пачĕ. Пур предметпа та "тăваттă" тата "пиллĕк" паллăсемпе ĕлкĕрсе пырать. Группа старости.
Женя пиçиххипе кĕрешессине малалла аталантарса пырать. Вăл - çак кĕрешÿ енĕпе спорт мастерĕн кандидачĕ. Тĕрлĕ шайри ăмăртусенче лайăх кăтартусем çĕнсе илет. СССР летчик-космонавтне А.Г.Николаева асăнса ирттернĕ чемпионатра, регионсен "Воин-интернационалист" турнирĕнче, "Пиçиххипе кĕрешесси "Кĕрешÿ" вице-президенчĕн А.В.Ивановăн парнисене çĕнсе илессишĕн йĕркеленĕ ăмăртура Е.Гурьева хăйĕн виçе категорийĕсенче пĕрремĕш вырăн йышăннă. Çĕнтерÿсем малашне те пулĕç.
Женя волейбол вăййипе те кăсăкланать. Вăл - колледжри хĕрсен пĕрлештернĕ командин членĕ. Команда тĕрлĕ ăмăртура малти вырăнсене йышăннинче Енĕш Нăрваш пикин тÿпи те пур.
Музыка уйрăмĕнче иккĕмĕш курсра вĕренекен Т.Урослова пирки те колледжра ырă сăмах сахал мар илтме пулать. Тамара- Канаш хĕрĕ, нумай ачаллă çемьере ÿснĕ. Çавăнпа та пурнăç тути-масине пĕчĕклех тутанма тивнĕ. Çĕмĕрле хулинчи пĕтĕмĕшле пĕлÿ паракан санатори тĕп шкулĕнче вĕреннĕ. Халăх юррисене юрлама, сăвă калама кăмăлланă. Ăна час-часах сцена çинче курма пулать. Унăн пултарулăхне колледжра вĕренекенсем те, хула çыннисем те хапăлласа йышăнаççĕ, хыттăн алă çупса тав тăваççĕ. Мероприятисенче хастар. Республикăра ирттерекен пултарулăх конкурсĕсене, фестивальсене хутшăнать. Вĕсенчен наградăсăр таврăнни сайра пулать. Çĕнсе илнĕ дипломсене, грамотăсене, тав çырăвĕсене пĕр купана хурсан самаях хулăн кĕнеке евĕр пулса каять.
Женя Гурьевăпа Тамара Урословăна курăмлă çитĕнÿсем тунăшăн Чăваш Республикин Пуçлăхĕн ятарлă стипендине илсе тăракансен йышне кĕртнĕ. Иккĕшĕ те пĕлĕвне аслă вĕренÿ заведенийĕсенче ÿстерес шутлă. Апла пулсан вĕсене ăнăçу сунар.
Виталий АЧЧА.
ŸКЕРЧĔКРЕ: Тамара Урословăпа Евгения Гурьева.
Автор сăн ÿкерчĕкĕ.