18 февраля 2015 г.
Февралĕн 13-мĕшĕнче Иван Моторин премьер-министр Тăван çĕршывăн 1941-1945 çулсенчи Аслă вăрçинче çĕнтернĕренпе 70 çул çитнине хатĕрленсе уявлас тĕлĕшпе ĕçлекен йĕркелÿ комитечĕн ларăвне ирттернĕ.
Ларура Çĕнтерÿ тунăранпа 70 çул çитнине уявлас умĕн экстремистла террорла ĕçсем пуласран ведомствăсен хушшинчи çыхăнăва йĕркелес, Шупашкар хулинче Совет Союзĕн Геройĕн Ф.Н.Орловăн ИЛ-14 самолетне вырнаçтарассипе çыхăннă мероприятисене, "Ăрусен пĕрлĕхĕ" проекта пурнăçлас тата ытти ыйтăва пăхса тухнă.
Çĕнтерÿ кунĕнче Хула пуçлăхĕ Леонид Черкесов Шупашкарти пысăк та пĕлтерĕшлĕ мероприятисем иртесси пирки пĕлтернĕ. Ачасемпе çамрăксем валли "Астăвăм маршручĕсем", "Раççей патриочĕсене ÿстеретпĕр", "Çĕнтерÿ салтакĕсем" проектсем, "Çĕнтерÿ кубокĕ" мини-футбол турнирĕ пулĕç. "Çĕнтерÿ çулçыравĕ" проект та Шупашкарсене пурне те пĕрлештерĕ.
Шупашкар гарнизонĕн полкĕ тата çар техники иртни чун-чĕрене мăнаçлăх туйăмĕ парнелĕ.
Культура, национальноç-сен ĕçĕсен тата архив ĕçĕн министрĕ Вадим Ефимов Раççей Федерацийĕн Президенчĕн Управленийĕ Тăван çĕршывăн 1941-1945 çулĕсенчи Аслă вăрçинче çĕнтернĕренпе 70 çул çитнине уявлассине йĕркелеме патшалăх службин тата кадрсен ыйтăвĕсемпе хатĕрленĕ информаци-методика материалĕсемпе паллаштарнă. Чăваш Республикин ĕç тăвакан влаç тата вырăнти хăйтытăмлăх органĕсене çак мероприятисене тĕпе хума сĕннĕ.
- Тăван çĕршывăн Аслă вăрçинче çĕнтернĕренпе 70 çул çитнине тивĕçлĕ шайра паллă тумалла, - ларăва пĕтĕмлетнĕ премьер-министр.
А.ВАСИЛЬЕВА.