11 февраля 2015 г.
Нарăсăн 8-мĕшĕнче пур çĕрте те "Раççей йĕлтĕр йĕрĕ - 2015" чупу иртрĕ. Тури Юнтапара пурăнакансем те хĕллехи спорт уявне хутшăнмасăр юлмарĕç. Ирхине 9 сехете ялти пуçламăш шкул-ача садне пуçтарăнчĕç. Çынсен сăн-пичĕ савăнăçпа çиçрĕ.
Спорт уявне шкул директорĕ Любовь Михайлова уçрĕ. Любовь Сергеевна ăмăртăва хутшăнакансене ăнăçу сунчĕ, спорт сывлăха çирĕплетмелли чи лайăх мел пулнине палăртрĕ.
Йĕлтĕрçĕсем хушшинче тупăшу хĕрÿ иртрĕ. Пĕрремĕш-пе иккĕмĕш классенче вĕренекенсем хушшинче финиша чи малтан Карина Фроловăпа Артем Афанасьев çитрĕç. Таня Михайловăпа Антон Егоров виççĕмĕш вырăн çĕнсе илчĕç.
Виççĕмĕш, тăваттăмĕш классенче вĕренекенсенчен Максим Надежкин - пĕрремĕш, Леонид Семенов - иккĕмĕш, Верония Андюкова - виççĕмĕш чупса çитрĕç.
Ашшĕ-амăшĕ хушшинче пĕрремĕш вырăна Владимир Афанасьев, иккĕмĕшне - Юрий Михайлов, виççĕмĕшне Екатерина Константинова йышăнчĕç. Малти вырăна тухнисене пурне те Хисеп грамотипе, сувенирсемпе, ăмăртăва хутшăнакансене пĕчĕк парнесемпе чысларĕç. Пурне те вĕри чейпе, икерчĕпе хăналарĕç.
Спорта кăмăллакансем йĕлтĕрпе чун каничченех ярăнчĕç. Хаваслă уяв чылай çынна савăк кăмăл парнелерĕ.
А. СВЕТЛОВА.