04 февраля 2015 г.
Чăваш Республики хуçалăха тытса пырассин пĕчĕк формине аталантарас тĕллевпе фермер тата çемье выльăх-чĕрлĕх фермин ĕçĕсене пуçăнакансене пулăшмалли программăна тăваттăмĕш çул хутшăнать. Çак тапхăрта республикăра 151 хресчен (фермер) хуçалăхне тата 16 çемьене выльăх-чĕрлĕх фермине йĕркелесе яма патшалăх енчен пулăшнă.
Иртнĕ эрнере район администрацийĕн пуçлăхĕн çумĕн ĕç пÿлĕмĕнче "Фермер ĕçне пуçăнакансене пулăшасси" тата "Çемье выльăх-чĕрлĕх фермине аталантарасси" программăсемпе вĕренÿ семинарĕ ирттернĕ. Унăн ĕçне харпăр хушма хуçалăхсен хуçисем, фермер ĕçне пуçăнакансем, хресчен (фермер) хуçалăхĕсен ертÿçисем, район администрацийĕн агропромышленность организацийĕсемпе çыхăнса ĕçлекен пайĕн специалисчĕсем тата Чăваш Республикин Ял хуçалăх министерствин Канаш районĕпе ĕçлекен специалисчĕ В.Воробьева хутшăннă.
Семинара хутшăнакансене район администрацийĕн пуçлăхĕн çумĕ А.Егоров саламланă. Вăл каланă тăрăх, юлашки икĕ çулта хресчен (фермер) хуçалăхне йĕркелесе яма тата ăна аталантарма районта 6 çын, 1 çын çемье выльăх-чĕрлĕх фермине аталантарма грант формипе патшалăх пулăшăвĕ илнĕ.
Чăваш Республикин "Агро-Инновации" патшалăх унитарлă предприятийĕн информаципе тишкерÿ уйрăмĕн экономист консультанчĕ И.Николаева ведомствăсен тĕллевлĕ программисемпе килĕшÿллĕн патшалăх енчен пулăшу памалли мерăсем çинчен тĕплĕн каласа панă. Конкурс комиссине заявка тăратмалли йĕркепе паллаштарнă, конкурса хутшăнма мĕнле документсем хатĕрлемелли пирки ăнлантарнă. Инна Святославовна семинара килнисен пĕр ыйтăвне те хуравсăр хăварман.
А.ВИТАЛЬЕВ.