04 февраля 2015 г.
2014 çулхи апрель уйăхĕн 16-мĕшĕччен районта пурăнакан халăха социаллă хÿтлĕх паракан центра ваттисен вăхăтлăх пурăнмалли 3 уйрăмĕ кĕнĕ. Вĕсем Сиккасси, Çеçпĕл тата Пайкилт ялĕсенче вырнаçнă. 2006 çултан пуçласа 2014 çулччен асăннă центра Любовь Валерьевна Васильева ертсе пынă. Çак виçĕ ялта вырнаçнă уйрăмсенче районти ялсенче тĕрлĕ сăлтава пула пĕччен тăрса юлнă ватăсем хÿтлĕх тупнă.
Пайкилт ялĕнче вырнаçнă уйрăм 1997 çулхи февраль уйăхĕнче ача сачĕ пулнă çуртра ĕçлеме пуçланă. Унăн малтанхи ертÿçи Валентина Ивановна Григорьева пулнă, унччен вара вăл нумай çул ача сачĕн коллективне ертсе пынă. 2010 çултанпа çак ĕçе Ирина Филипповна Павлова ăнăçлă йĕркелесе пырать. Ватăсен çуртĕнче 18 çын пурăнмалăх вырăн пур. Тăватă çынран тăракан социаллă пулăшу паракан ушкăн хăйĕн ĕçĕсене тăрăшса, тĕплĕн те пĕлсе пурнăçлать. Апат пĕçерекен Надежда Ивановна Михайлова уйрăма уçнăранпах ĕçлет, вăл хатĕрленĕ апатсем яланах тутлă, ватăсем кăмăлпах çиеççĕ. Ветерансене хÿтлĕх паракан çурта концерт лартма пырсан эпир те астивсе пăхнă - ун хыççăн пĕр виçĕ кун нимле апат та çиес килмест.
Любовь Ивановна Михайлова ĕçлеме пуçлани те январь уйăхĕнче10 çул çитрĕ. Кашни эрнере мунча хутса кĕртеççĕ, утма пултарайманнисене çăвăнма кÿмепе илсе каяççĕ, ватăсен кĕпе-тумне, вырăн таврашне çăваççĕ. Кунне тăватă хутчен апат пĕçерсе çитереççĕ. Çулла пахча çимĕç ÿстереççĕ, ытти ĕçсене пурнăçлаççĕ.
Кану пÿлĕмĕнче телевизор, "Ветеран кĕтесĕ" тата тĕрлĕ информаци вырнаçтарнă стендсем, Турă кĕтесĕ пур, кĕнекесемпе хаçат-журнала çемçе диван çине ларса вулама пулать. Столовăйра апат-çимĕçе упрама холодильник вырнаçтарнă. Сăмах май, 2013 çулта пĕр холодильникне район администрацийĕн пуçлăхĕ В.Софронов парнеленĕ. Чăваш Республикин Патшалăх Канашĕн депутачĕ В.Иванов уявсенче ватăсене канфет-премĕкпе хăналать.
Çак çуртра хăйсене хÿтлĕх тупнă çынсем хăйсене пăхса усракансене чĕререн тав тăваççĕ, тимлĕ пулнăшăн питĕ кăмăллă. Сĕнÿсен кĕнекинче заведующипе социаллă ĕçченсене ырласа çырнине кăна вулама пулать.
Пайкилт ялĕнчен кил-нĕ тыл ĕçченĕ, ĕç ветеранĕ Елена Николаевна Карабашева сасартăк чирлесе ÿксен Виталий Ивановичпа Альбина Федоровна Ивановсем (Пайкилт ялĕ) тата кунти социаллă ĕçчен тăрăшнипе "васкавлă пулăшу" ушкăнĕ килнĕ, чире палăртса эмелсемпе уколсем тума палăртнă. Çак ĕçсене Пайкилтри офис врачĕ Эрнст Гаврилович Ильин йĕркелесе пырать, медицина сестри Татьяна Анатольевна Филиппова вăхăтра уколсем туса ватă çынна ура çине тăма пулăшнă. Пĕрле пурăнакан ватăсем те айккинче тăман - май килнĕ таран пулăшнă. Халĕ Е.Карабашева хăйне лайăхрах туять, сывалма пулăшнă çынсене пурне те тав тăвать.
2014 çулхи апрелĕн 16-мĕшĕнче Канаш хулипе районĕнче пурăнакан халăха социаллă хÿтлĕх паракан центрсене пĕрлештернĕ. Комплекслă центрăн директорĕ пулма Марина Ивановна Никитинăна уйăрса лартнă. Любовь Валерьевна унăн çумĕ пулса ĕçлет. Çĕнĕ ĕçе Марина Ивановна питĕ хастаррăн та хавхаланса пуçăнчĕ: Пайкилтри ваттисен çурчĕн чÿречисене пластикран тунисемпе, çурта кĕмелли йывăç алăксене тимĕррисемпе улăштарма, çурт тăррине шифер вырăнне шуç тимĕрпе витме тата ытти ĕçсем тума май тупрĕ. Халĕ пÿлĕмсенче çутă та ăшă, ватăсем хăйсемшĕн çавăн пек тăрăшнăшăн питĕ кăмăллă - чун-чĕререн тав тăваççĕ.
2011 çулта районти ветерансен канашĕн ертÿçи Мария Никитична Данилова сĕннипе вырăнти ветерансен канашĕпе ваттисен çурчĕ хушшинче туслă та ĕçлĕ çыхăнусем пуçланчĕç. И.Павлова ыйтнипе праçниксенче, çуралнă кунсенче Çĕнĕ Мамири ветерансен "Пуранар" ушкăнĕ концертсем лартать, ял тăрăхĕнчи культура ĕçченĕсемпе шкул ачисем те ватăсене савăнтараççĕ.
Аслă Çĕнтерÿ 70 çул тултарнине халалласа шкул ачисем "вăрçă ачисемпе" калаçусем ирттереççĕ. Ватăсем вăрçă вăхăтĕнче Çĕнтерĕве çывхартма тылра çамрăклах кунĕн-çĕрĕн аслисемпе тан ĕçленине аса илеççĕ, шывланнă куçĕсене шăлса типĕтеççĕ.
Ватăсене район администрацийĕ, социаллă хÿтлĕх пайĕ, ветерансен канашĕн тата ял тăрăхĕн пуçлăхĕсем тăтăшах килсе ватăсен пурнăçĕпе интересленеççĕ, кирлĕ чух пулăшма тăрăшаççĕ.
Михаил ИВАНОВ,
Пайкилт ял тăрăхĕнчи ветерансен канашĕн председателĕ.