18 июня 2014 г.
Авалхи çынсемех апатланни сывлăх мĕнле пулассине витĕм кÿнине палăртнă. Вăл е ку çимĕçе пула час-часах чирленине, япăх ĕçленине, вăхăтсăр пурнăçран уйрăлнине, ачасем хавшак ÿснине тата аталаннине курнă-ха та. Çак пулăмсем паянхи кун çивĕчленсе кăна пыраççĕ тесен те йăнăш пулмĕ. Ăçта пахалăхлă çимĕç пулнине куçпа пăхса пĕлеймĕн те. Хăш-пĕр чухне лаборатори тĕпчевĕсем кăна пахалăха палăртма пулăшаççĕ. Акă нумаях пулмасть Россельхознадзорăн республикăри управленийĕн инспекторĕсем "Ăс-тăн енчен аталанса çитеймен ачасен Кÿкеçри интерначĕ" бюджет учрежденийĕнче тĕрĕслевпе пулнă май шăнтнă сысна какайне вет-санэкспертизăна панă та КМАФАнМ текен бактери виçи нормăран пысăкки палăрнă. Республикăри шкул тата ача сачĕсене çÿрекен шăпăрлансене мĕнле какайран кăна мар, кĕрперен апат-çимĕç пĕçернипе те кăсăклансах тăраççĕ управлени специалисчĕсем. Чăнах та иккен, кĕрпе пахалăхĕнче иккĕленме сăлтавсем тупăнаççĕ. Акă нумаях пулмасть прокуратура ĕçченĕсемпе управлени инспекторĕсем Шăмăршă районĕнчи ачасен вĕренÿ учрежденийĕсенче пулнă. Кашнинчех РФ апат-çимĕç продукчĕсен пахалăхĕ тата хăрушсăрлăхĕ çинчен калакан саккуна епле пăхăннине тĕрĕсленĕ. Усă курнă тата упранакан кĕрпесен тĕлĕшпе маркировка тата кирлĕ ытти документ пулман. Маркировкăсăр апат-çимĕçе вара пахалăхсăррисен шутне кĕртеççĕ. Мĕншĕн тесен апат-çимĕç ăçтан килнине тата хăçанччен усă курма юрăхлине пĕлме çук. Çынсен сывлăхĕшĕн хăрушлăх кăларса тăратать тесе шутланă май ăна утилизацилемелле е тĕп тумалла. Пай пуçлăхĕн çумĕ Расим Асеинов каласа панă тăрăх, пĕлтĕр шкул тата шкулчченхи учрежденисенче прокуратура ĕçченĕсем йĕркеленĕ 58 тĕрĕслеве хутшăннă. Пĕр пекрех йĕркесĕрлĕхсем тĕл пулнине палăртать вăл. Маларах каларăм ĕнтĕ, пĕрремĕшĕ вăл - маркировка тата ытти документ çукки. Учрежденисем кĕрпесене туяннă чухне патшалăх стандарчĕсен требованийĕсене пăхăнманнине те аса илеççĕ инспекторсем. Çакă вара хăш-пĕр япăх пулăмсене аталанма "çул уçасси" паллă. Сăмахран, инфекци чирĕсене сарăлма е массăлла наркăмăшланма. Çитĕнекен ăрăвăн представителĕсен сывлăхне килте кăна мар, вĕреннĕ вăхăтра та упрасчĕ. Вĕсен пире ватлăхра пулăшма тата пăхма тĕреклĕ те маттур пулмалла.
Н.ВАСИЛЬЕВА, управлени ĕçченĕ.