09 апреля 2014 г.
Тăваттăн, Губаревăпа Новикова, Максимовăпа Семенова (хушамачĕсене улăштарнă) кухньăра эрех ĕçсе ларнă. Самаях сÿсленнĕ вĕсем. Губаревăпа Новикова пуçне çухатман. Эрех сĕрĕмне çĕнтерсе каварлă ĕç тума калаçса татăлнă. Максимован пурлăхĕ канăçсăрлантарнă хайхискерсене. Пĕр шутлă пулса Максимова çине сиксе ÿкнĕ. Ăна питĕнчен, çурăмĕнчен çапнă, çÿçĕнчен туртнă, питне-куçне кăвакартнă, кăкăрне амантнă. Пĕри ăна чĕркуçлентернĕ те хул пуççийĕ çине утланса ларнă, çав вăхăтра тепри хăлха çаккисене вĕçертнĕ, енчĕкне туртса илнĕ. Унта 4341 тенкĕ те 30 пус пулнă. Губаревăна икĕ çул çурăна хупмалла тунă, ăна вăл ĕçлесе юсанмалли çирĕп режимлă колонире ирттерĕ. Новиковăна 3 çул та 6 уйăха ирĕклĕхрен условно хăтарнă.
В.СНЕЖКОВ.