15 ноября 2013 г.
Пирĕн ял, Уçырма, Канаш хулипе юнашарах вырнаçнă. Пĕрре шухăшласан çакăнта аван енне кăна курмалла пек: район центрне туххăмрах кайса килме пулать. Шел, вырăнти çынсен хулан япăх витĕмне ытларах курма тивет çав...
Урам тасалăхĕ – ял илемĕ. Уçырмара пурăнакансем хăйсем пурăнакан вырăна тирпейлеме вĕрен-нĕ. Ялти хытă çÿп-çапа çынсем ятарлă лаптăка хураççĕ. Ял тăрăхĕн администрацийĕ ăна транспортпа тĕллевлĕн уйăрнă вырăна илсе тухма пĕр предприятипе килĕшÿ тунă.
Хитрелĕхпе киленме мĕн чăрмантарать-ха тетĕр-и; Хула çыннисен хытă каяша пăрахма ансат: контейнер – картишĕнче темиçе те. Шел, хăшĕ-пĕри çÿп-çапа михĕсемпе хула çывăхĕнчи çул айккине ывăтса хăварать. Вăрман хĕрринче те, посадкăсенче те курма пулать ăпăр-тапăра. Уçырма çывăхĕнчи çырмасенче çавнашкал "мул" мĕн чухлĕ тата! Çиллĕ çанталăкра йĕри-тавра выртакан çăмăлрах çÿп-çап ял урамĕсене те вĕçсе килет. Ял-йыш вăхăтра тасатмасан ăпăр-тапăр айнех пулăпăр.
Тавралăха вараламасăр пурăнма, уçă сывлăшра хăтлă туяссишĕн хамăрăнах тăрăшма хăнăхасчĕ.
А.ВАСИЛЬЕВ.