06 сентября 2013 г.
Юн кун район администрацийĕн граждан акчĕсене çыракан пайĕнче çулталăк пуçланнăранпа çут тĕнчене килнĕ 350-мĕш ачана регистрациленĕ. Хĕр пĕрчин ашшĕ-амăшĕ Кăшнаруй ялĕнчен: Оксана Олеговнăпа Константин Анатольевич Никоноровсем. Асли, Иван,10-мĕш класра пĕлÿ илет. Ольга 6-мĕш класа çÿрет, шăпах вăл ĕнтĕ йăмăкĕ валли илемлĕ ят суйласа илнĕ: Елена.
Никоноровсем – вĕ-реннĕ, ĕçчен, яваплă, ырă çынсем. "Весна" тулли мар яваплă пĕрлĕх ĕçĕсене йĕркелесе тăраççĕ, халăха потребитель пулăшăвĕ параççĕ. Вĕсен кĕçĕн хĕрĕ те хăйсем пекех ĕçрен хăрамасăр çитĕнес пирки нимле иккĕленÿ те çук.
ЗАГС ĕçченĕсем савăнăçпа çиçекен ашшĕне хĕрĕ çуралнă çинчен пĕлтерекен ĕнентерÿ хучĕ, парне тата чечек панă. Саламлакансем çумне район администрацийĕнче ĕçлекенсем те хушăннă.
И.МОРОЗОВА.