17 июля 2013 г.
Автотранспортпа çÿрекен пассажирсем паян – çул-йĕр участникĕсен нимĕнле хÿтлĕхпе те тивĕçтермен категорири çынсем. Статистика кăтартăвĕсем тăрăх, аварисенче пассажирсен пĕрре виççĕмĕш пайĕ вилнĕ тата аманнă. Автотранспортпа çула ларса тухакансенчен чылайăшĕ хăрушсăрлăх хатĕрĕсемпе – хăрушсăрлăх пиçиххийĕпе, минтерĕпе, ачасене лартса çÿремелли ятарлă ларкăчсемпе – усă курма е вĕсем çинчен пĕлмеççĕ.
2013 çулта пассажирсене турттаракан автотранспорт хатĕрĕсем 76 хутчен аварине лекнĕ, вĕсенче 4 çын пурнăçĕ татăлнă, 123 аманнă (2012 çулта: 107 – 3 – 148). Автобуссен водителĕсен айăпĕпе 43 инкек пулнă, 1 çын вилнĕ (2012 çулта: 55 – 1 – 76).
Инкексен сăлтавĕ чи малтанах пысăк хăвăртлăхпа пынипе çыхăннă. Автотранспортсен хушшинчи дистанцие тĕрĕс тытса пыманнипе, хирĕçле килекен куçăм йĕрĕ çине тухса кайнипе, çуран çÿрекенсем çул-йĕр правилисене пăснипе, светофор сигналĕсене шута илменнипе хăрушă аварисем пулаççĕ те.
Пассажирсене турттаракан транспорт хатĕрĕсене тĕрĕслени çакна кăтартса парать: çынсене автобуссене палăртнă хисепрен нумайрах лартаççĕ, водительсем хăвăртлăх режимне пăсаççĕ, саппас алăксемпе чÿречесем юсавсăр е вĕсене уçăлмалла мар туса хураççĕ.
Автобуссемпе çул çÿрекенсене хăрушсăрлăхпа тивĕçтерес, водительсем хушшинче дисциплинăна çирĕплетес тĕллевпе район территорийĕнче июлĕн 12-мĕшĕнче "Автобус" рейд ирттернĕ.
Д.ГУСЕВ,
районти ГИБДД уйрăмĕн пуçлăхĕ.