12 июля 2013 г.
Аслати çут çанталăкра пулса иртекен хăрушă пулăмсенчен пĕри шутланать. Вăл "кĕрленĕ" чухне пушарсем тухма, хуралтăсем ишĕлме, çыхăну тата электричество пралукĕсем татăлса анма пултраççĕ. Аслати вăхăтĕнче чи хăрушши – çиçĕм, вăл çынсене те, выльăх-чĕрлĕхе те çапма пултарать.
Тĕслĕхрен, пĕлтĕр утă уйăхĕнче рспубликăра хăрушла аслати пулса иртнĕччĕ, вăйлă çил тата пăр Сĕнтĕрвăрри, Çĕрпÿ, Канаш тата Улатăр районĕсем урлă тухса кайнă. Çил-тăвăл çурт тăррисене сиенлетнĕ, йывăçсене хуçнă, электричество пралукĕсене татнă, ял хуçалăх культурисене пĕтернĕ, выльăхсене вĕлернĕ тĕслĕхсем те пулнă.
Кăçал çĕртме уйăхĕн 23-мĕшĕнче Ачча ялĕнче пĕр инкек пулса иртнĕ. Вăйлă çил вăхăтĕнче юпа çинчи электричество пралукĕ татăлса аннă та кĕтÿрен таврăнакан ĕнене лекнĕ. Ток çапнипе ĕне вилнĕ.
Аслатиллĕ çумăр çывхарнине курсан выльăхсене витене хăваласа кĕртĕр, енчен те кун пек тума май килмесен кĕтĕве айлăм вырăна хăваласа анăр та аслатие унта кĕтсе ирттерĕр. Шыв çумĕнчен аяккарах кайăр, электричество линийĕсем çумне ан пырăр. Витесене çиçĕм çапасран хăрушлăх хатĕрĕсем вырнаçтарăр.
Н.АНДРЕЕВА,
районти ветстанцин пуçлăхĕн ĕçĕсене туса пыракан.