24 августа 2012 г.
Етĕрне хулинчи 3-мĕш номерлĕ вăтам шкулăн акт залĕ дискусси площадки пулса тăнă. Унта "Чăваш Республикинчи хуласемпе районсенчи пултаруллă, ăслă çамрăксене пулăшасси" темăпа хĕрÿ калаçу пынă. Туслă тавлашăва çамрăксемпе ĕçлекен специалистсем хутшăннă.
Калаçăва Етĕрне район администрацийĕн вĕрентÿ тата социаллă политика пайĕн пуçлăхĕ А.Филимонов уçнă. Чăваш Республикин Вĕренÿ тата çамрăксен политикин управленийĕн пуçлăхĕ А.Львов дискусси темипе доклад тунă. Шупашкар хула администрацийĕн çамрăксен тата обществăлла аталану пайĕн пуçлăхĕ Э.Черкесов тата Етĕрне район администрацийĕн вĕрентÿ тата социаллă политика пайĕн тĕп эксперт специалисчĕ Н.Степанова пултаруллă çамрăксемпе ĕçлес енĕпе пухăннă опытпа паллаштарнă. Йĕпреç, Куславкка, Шăмăршă районĕсен çамрăксемпе ĕçлекен специалисчĕсем К.Гурьева, Т.Краснова, Э.Филиппова малашне тума палăртнă ĕçсем çинчен каласа панă.
Çамрăксемпе тата ачасемпе ĕçлес енĕпе ирттернĕ конкурса пĕтĕмлетнĕ. Пирĕн район администрацийĕ çĕнтерÿçĕ пулса тăнă. Вĕренÿ управленийĕн тĕп эксперт специалисчĕ А.Павлова професси ăсталăхĕн конкурсĕнче виççĕмĕш вырăна тивĕçнĕ.
А.ТЯМИНА.