05 мая 2012 г.
Маякри клуб администраторĕ Г.Сергеева тата Çĕнĕ Шелттемри библиотека заведующийĕ Т.Иванова Тăван çĕршывăн Аслă вăрçин ветеранĕсем Анна Свиридовна тата Иван Васильевич Романовсем патĕнче пулчĕç. Вĕсем Маякри хисеплĕ ватăсене çывхарса килекен Аслă Çĕнтерÿ уявĕпе саламларĕç.
Романовсен пурнăçĕ вăрăм та тĕрлĕ енлĕн. Анна Свиридовна Украинăра çуралнă, Иван Васильевич чăвашран. Пĕр-пĕринпе вĕсем 1944 çулта çар госпиталĕнче сывалнă чухне паллашнă. 1947 çулта вĕсен пурнăç çулĕ пĕрлешнĕ. Маяк ялĕнче пурăнма тытăннă. Анна Свиридовна район больницинче, Сиккассинчи участок больницинче медсестрара ĕçленĕ. Иван Васильевич вырăнти вăрман пунктĕнче платник, столяр пулса вăй хунă. Çар наградисем çумне ĕç наградисем хушăннă. Иртнĕ çулхи августăн 2-мĕшĕнче Романовсем мăшăрланнăранпа 64 çул çитнине паллă турĕç.
Ветерансем хăйсен йывăр ачалăхне, вăрçăн хаяр кунĕсене куççуль витĕр аса илчĕç. Г.Сергеева Анна Свиридовнăпа Иван Васильевича çамрăк ăру тата ял летопиçĕ валли курав камерипе ÿкерчĕ.
А.ТЯМИНА.