20 января 2012 г.
Чакаç ялĕнче пурăнакан 47 çулти арçын тĕлĕшпе пуçарнă уголовлă ĕçе тĕпчесе пĕтернĕ. Ăна влаç представителĕсене хирĕç тăнăшăн айăпланă.
Следстви версийĕпе, 2011 çулхи ноябрĕн 2-мĕшĕнче ирпе ирех арçын эрех пайлайманнипе хăйĕн арăмĕпе хирĕлме пуçланă. Хĕрарăмăн ирĕксĕрех полици сотрудникĕсене чĕнсе илме тивнĕ. Йĕрке хуралçисем вырăна çитсен ÿсĕр "паттăра" районăн полици пайне пыма ыйтнă. Кил-тĕрĕшре харкашнăшăн административлă йĕркепе явап тытас килменрен ÿсĕрскер полици сотрудникĕсене хирĕç тăнă: пĕрне питрен пуçпа тăрăнтарнă, теприне сылтăм уринчен çыртса илнĕ. Çавна май арçыннăн аллисене кантрапа çыхса лартма тивнĕ, ăна районти полицие илсе çитернĕ.
Следователь айăплав валли кирлĕ çирĕплетÿсем пуçтарса çитернĕ, çавăнпа та айăплав пĕтĕмлетĕвне Канаш район судне ярса панă.
Ю.КОНСТАНТИНОВ, аслă следователь.