21 декабря 2011 г.
Чăвашсен паллă писателĕ, поэчĕ, пирĕн районти Ешкилт ялĕнче çуралса ÿснĕ Александр Аслут ыран 81 çул тултарать. Нумаях пулмасть Шуркассинчи тĕслĕх библиотека заведующийĕ Л.Филиппова сăмах ăстин килĕнче Шупашкарта пулнă. Ăна Александр Николаевичпа мăшăрĕ ăшшăн кĕтсе илнĕ.
Çыравçă хăйĕн çăмăлах мар ачалăхне, хаçатра ĕçленĕ çулсене аса илнĕ, пурнăçĕнчи паллă самантсем çинче чарăнса тăнă. Александр Николаевичăн пултарулăхне Халăхсен туслăхĕн орденĕпе, медальсемпе хакланă, вăл Чăваш Республикин культурăн тава тивĕçлĕ ĕçченĕн ятне тивĕçнĕ. Мухтавлă ентешĕмĕр хăйĕн наградисене, çырнă кĕнекисене кăтартнă. Людмила Васильевна писателе пысăках мар парне панă, асăнмалăх сăн ÿкерĕннĕ.
Николаевсем хăйсене хисеплесе килнĕшĕн, манманшăн тав тунă, тутлă çимĕçпе сăйланă.
А.ВИТАЛЬЕВ.