09 декабря 2011 г.
Европа çĕршывĕсенче хурт-кăпшанкăпа апат-çимĕç хатĕрлеме пуçлаççĕ.
Нумай миллион тенкĕ тăракан программăн тĕп тĕллевĕ – тĕрĕс мар апатланнине хирĕç кĕрешесси тата тăван тавралăха сиен кÿрекен хурт-кăпшанкăран тасатасси. Юлашки вăхăтра тунă тĕпчев хурт-кăпшанкăра усăллă белокпа минерал тата микроэлемент çав тери нумаййине палăртнă. Тĕслĕхрен, шăрчăк 20 процент таран белокран тăрать, çу хисепĕ вара питĕ пĕчĕк – 6 процент çеç.
Çĕнĕ программăна пурнăçа кĕртме 4,5 млн доллар уйăраççĕ. Çакă çынсен апат ирĕлтерекен органне лайăхлатма пулăшнисĕр пуçне тыр-пула саранчаран хÿтĕлеме те пулăшĕ. Супермаркетсен çÿлĕкĕсене саранчасăр пуçне ытти хурт-кăпшанкăпа та тултарма палăртаççĕ.
Тĕнчери халăх йышĕ ÿссе, белокпа пуян ĕне выльăх ашĕ сахалланса пырать. Çавăнпа та хурт-кăпшанкăран хатĕрленĕ апат йăлана кĕнĕ аш çимĕçĕсене çăмăллăнах улăштарма пултарĕ.
Е.НИКОЛАЕВА хатĕрленĕ.