14 октября 2011 г.
Ĕçлесе юсанмалли колонире "кирпĕч шутлакан" Ермаковпа Ильин (хушамачĕсене улăштарнă) кĕсье телефонĕпе наркотик тупса пама икĕ çынран ыйтнă. Лешсем килĕшнине сăмахпа çирĕплетнĕ.
Килĕшсе татăлнисенчен пĕри, шыравра пулнă пирки вăл камне хальлĕхе пĕлме май килмен-ха, хăйĕн рольне "выляма" пуçланă. Вăрттăн майпа гашиш туяннă, ăна килне илсе кайса кĕсье телефонне заряд памалли хатĕре вырнаçтарнă. Темиçе кунтан çак хатĕре Петрова (хушаматне урăхлатнă) унта мĕн пуррине пĕлтермесĕрех тыттарнă. Лешĕ Ермаковпа Ильин хушнине пурнăçлас тĕллевпе Канашра автовокзал çывăхĕнче пачах урăх çынна панă. Вăл вара гашиш тултарнă зарядника тĕрлĕ çимĕç тултарнă посылкăна чиксе почтăран Андреев (хушамачĕ хăйĕн мар) ячĕпе ăсатнă.
Посылка кирлĕ çĕре çитеймен. Ăна почта уйрăмĕнчех тĕрĕсленĕ. Часах следстви пуçланнă. Сучĕ те пулнă. Ермаковпа Ильина ултшар çула ирĕк прависĕр хăварнă.