06 мая 2011 г.
Нумаях пулмасть Ухман шкулĕ çумĕнчи автодромра çул-йĕрĕн çамрăк инспекторĕсен "Хăрушсăрлăх кустăрми" конкурс иртрĕ. Ăмăртăва районтан пĕтĕмпе 13 шкул хутшăнчĕ. Шкулсем хăйсен чысне хÿтĕлеме конкурса тăватă вĕренекене тăратрĕç: 2 арçын ача, икĕ хĕрача (вĕсен 10-12 çулта пулмалла).
Конкурс йĕркелÿçисем çамрăк инспекторсен ăсталăхне виçĕ номинацире хакларĕç. Вĕренекенсем çул-йĕр хăрушсăрлăх правилисене еплерех пĕлнине, пĕрремĕш пулăшу пама пултарнине тата велосипедпа çÿрес ăсталăха еплерех туптанине кăтартса пачĕç.
Конкурс пĕтĕмлетĕвĕсем çапларах пулчĕç: пĕрремĕш вырăна шуркассисем çĕнсе илчĕç (вĕсем республикăри ăмăртусене хутшăнĕç), иккĕмĕш вырăна Ухман шкулĕ тухрĕ, энтрияльсем – виççĕмĕш.
Çĕнтерÿçĕсене дипломсем тата хаклă парнесем парса хавхалантарнă.
М.ЮНУСОВ, районти ГИБДД уйрăмĕн пропаганда инспекторĕ.